Inuk Silis Høegh eqqumiitsuliaq nutaaq pillugu: Pinngortitami Kisimiinneq anersaakkut misigisassaqarfiuvoq

Qalipaat qorsuk filmertarfissuarmi taartumik tunuliaqutaqartumi soorlu arsarnertut ingerlaarpoq.

Inuk Silis Høegh Nuummi Eqqumiitsulianik Katersugaasivimmut tarrajuttumut qalipaammik qorsummik kisimi qaamaneqartumut iserpoq.

- Kakkaak, taartorujussuuvoq, eqqumiitsuliortoq oqarpoq, filmimillu takutitsivissap saanut issivimmut piareerneqarsimasumut ingerlalluni.

Qaamaneq maanna qaqqat qasertut atsissumiittunik pujoqartut saani qalipaat qorsuk pujorujussuartut ittunngorpoq.

Inuk Silis Høeghip filmi eqqumiitsuliaa ”The Green Land” unnugu takuteqqaarneqarnissamut piareersarneqaleruttorpoq. Eqqumiitsuliortup oqarnera malillugu eqqumiitsuliorneq qalipaammik qorsummik pinngortitamut pulaartumut imaluunniit isaasumut tunngassuteqarpoq.

- Qalipaat qorsuk imatut eqqarsaatigivara tassa naasut qalipaatigivaat, upernaaq, neriunneq assigisaallu, taavalu aamma pinngortitamik illersuisartut aamma qalipaatigaat. Akerlianik aamma mingutsitsineq ilaatigut qorsuusarpoq, eqqumiitsuliortoq filmiliortartorlu Inuk Silis Høegh oqarpoq, nangillunilu:

- Pinngortitami qalipaat qorsuk assaassissutaanersoq imaluunniit ullut naggatissarineraat paasineqarsinnaavallaanngilaq.

Marloqiusaaneralu silap pissusisata allanngoriarornerata nassatarisaanik sukkasuumik allanngoriartortoqarnerani nunatsinni pinngortitami aamma takussaasoq eqqumiitsuliortoq oqarpoq.

Suut tamarmik anersaaqartut

50-inik ukiullip Inuk Silis Høeghip ukioqqortusiartornerani nunatsinni pinngortitaq immini annertusiartorsimavoq.

Taanna meeraalluni kangerlummiinnani illoqarfimmiikkusunnerusarsimavoq, ukiulli ingerlanerani eqqissinerup pisariaqartinnera annertuneruleriartorsimalluni.

Inuk Silis Høegh. Assi: Ulannaq Ingemann.

Eqqissinerlu pinngortitami pingaarnerpaavoq.

- Uanga pinngortitamiikkaangama, kisimiivillunga, misigisimasarama soorlu nunarsuup erneratullussusooq, qanoq pinerpoq eqqumiitsumik, soorlu anersaanittartunga. Taava taanna misigissuseq misissorusullugu sunaanersoq, ilaa, pinngortitaq minguitsoq nuannaralugu, Inuk Silis Høegh oqarpoq.

Eqqumiitsuliortup oqarnera naapertorlugu Nuummi ilaquttanilu najukkaminni ulluinnarneq inooriaaseq pinngortitarsuarmut aamma aserorterisuuvoq.

- Kisiannili nalunagu aamma illoqarfimmiutut inuunermi pinngortitap mingutsinneqarneranut peqataallunga aamma silaannaap kissatsikkiartorneranut peqataallunga, taava taakku imminnut akerleriinnerat arlaatigut misissorusullugu una suliniut aallartissimavara, taanna oqarpoq.

Ajalusooriartortoq

Inuk Silis Høegh Eqqumiitsulianik Katersugaasiviup igalaavisigit imaanut tungujortumut isigaluni eqqumiitsuliani nassuiaatigaa.

Eqqumiitsuliaq ukiuni arfineq-marlunni suliarineqarpoq, taannalu nipinik eqqumiitsuliortup, Jacob Kirkegaardip assiliisartullu Ulannaq Ingemannip suleqatigineratigut suliarineqarpoq.

Pinngortitami immiussat Nuup eqqaani Maniitsullu avannaani immiunneqartut ilaatigut immap nipaanik immiussanik ilaqarput.

Naak ukiuni arfineq-marlunni eqqumiitsuliamik immiussanngortinneqaraluartoq angalaneq tamaannga killeqanngilaq.

- Qalipaat qorsuk nunamut pulaartoq pillugu kaavittumik oqaluttuaq uannut silap pissusiata ajalusoortitsiartorneranik ilisimanninnitsinnik isumaqarpoq. Kisianni ileqqorput malillugu inooriaaseqaannarpugut. Ippassaammatulli makittarpugut, inuunermillu allannguinissamut pilersaaruterpassuaqarpugut, tamatuma saniatigut ajalusooriartuinnavilluta, Inuk Silis Høegh oqarpoq.

Naak The Green Land Inuk Silis Høeghip oqarnera naapertorlugu aalajangersimasumik oqariartuuteqanngikkaluartoq taassuma isiginnaagassiap eqqumiitsuliap pinngortitatsinnut silallu pissusiata allanngoriartorneranut nutaanik apeqqutissaqalersitsinissaa neriuutigaa.

Isiginnaagassiaq eqqumiitsuliaq Nuummi Eqqumiitsulianik Katersugaasivimmi oktobarip qiteqqunnerata tungaanut isiginnaarneqarsinnaavoq.