Inuk saqqumilaartoq Facebookikkut siooratinneqartoq
![](/sites/default/files/styles/image_934x467/public/article_images/rasmus_hedeholm_emma_kristensen_2.jpg?itok=oPkutlO0)
Saarullittasseeqqittoqanngitsiartoq aalisartut Facebookimi oqalliffianni aalisartut oqallinnerat sakkortusigaluarpoq. Ima sakkortutigileraluarpoq allaat inuup, pisortani sulisut aalisakkanut tunngasunik oqaaserlutik sassartartut ilaata atia taallugu soraarsinneqarnissaannik unatarneqarnissaannillu oqariartuuteqartoqarpoq.
![](/sites/default/files/styles/image_934x467/public/facebook_1.jpg?itok=IAj_XcDO)
Nittartakkatigut oqallittarnerup sakkortusinnaanera Rosannguaq Rossenip Ilisimatusarfimmi tusagassiutilerinermi misissuisup, ilaatigut attaveqatigiittarfinnik misissuisup nassuiaatissaqartippaa.
- Nunatsinniinnaanngitsoq taamak pisoqartarpoq. Inuit akornanni nittartakkakkut attaveqaqatigiittarneq pinngormalli aatsaat ukiualunnguit qaangiupput. Inuit qanoq pissusilersussanerlutik suli nalusarpaat. Inuit akornanni attaveqarnermmiit allaanerummat, isigineqarani skærmip saavaniilluni ”toqqorluni” qanorsuaq allattoqartarpoq, Rosannguaq Rossen KNR-imut oqarpoq.
Ulluinnarni oqaloqatigiinneq nittartakkatigullu attaveqatigiinneq assigiinngilluinnartuusut Rosannguaq Rossenip erseqqissarpaa.
- Marluinnaalluni eqqartukkat sociale medianut allakkaanni tigusisussarpassuit atuartussarpassuillu assigiinngitsunik eqqarsartariaaseqarnerat paatsoortitsisarnerat allatulluunniit eqqarsartitsisarnerat atuuttarpoq. Sianiilliornerit pipallattaartoornerillu sianigisassaapput, Rosannguaq Rossen siunnersuivoq.
- Inuit ilaasa eqqartukkatik toqqaannaq sociale medianut nuuttaramikkit, assigiinnginnera eqqarsaatiginngitsoorlugu, nangilluni oqarpoq.
Pineqartoq tupassimasoq
- Taamatut misigisaqarnikuunngivippunga. Soorunalimi nuannersuunngilaq, isumaqarpata suliannut pikkorluttuusunga. Nunatsinni saarullinniarneq pillugu oqallinnermi misigissuserpassuit akuutinneqarneri pisup matuma takutiinnarpaa.
- Taamaakkaluartorli imaanngilaq tassa aalisartut pisinnaatitaaffeqalersut inoqatiminnut ataqqinninngitsumik pissusilersornissamik, oqaaseqartoq isumaqatiginnginnera peqqutigiinnarlugu, Emma Kristensen KNR-imut oqarpoq.
Taassuma oqaatsit oqaatigineqartut piviusunngoratarsinnaaneri annilaangassutigai.
- Tupinnarluinnaqaaq – tassa Nunatsinni tassunga killissimanerpugut, eqqarsaatit oqaatsillu aniatitagut qanorluunniit ajortigissagaluarpata tigusisussamullu qanorluunniit tussagaluarpata soqutaajunnaarlutik? Eqqarsaatit oqaatsillu kimittoorsuupput inuullu inuuneranut pissaanilissuullutik, taamaattumik eqqarsaatiginngitsoorsinnaanngilara arraa oqaatsitimmi piviusunngortillarunikkit.
- Soorunami tupinnaqaaq eqqarsaatit taama ittut sarsuatinneqarsimammata – unataavataaqquneqarlunga. Suliassakka suliariinnarpakka, sooq unatagaassutigissavakka – ilumoorsinnaanngilaq, Emma Kristensen oqarpoq.
Taassuma aamma oqaatigaa pisoq politiinut unnerluutiginiarlugu.
- Politiinut suliakkiutilerpara. Uppernarsaatissat pissarsiarisinnaasakka politiinut ingerlatissavakka, taakkulu suliap qanoq avoqqaarlernassusia aallaavigalugu aaliangissavaat suliaq qanoq pineqarumaartoq.
Politiit KNR-imut oqaatigaat Facebookikkut sioranarsinnaasunik allanneq pinerluttulerinermi inatsit aallaavigalugu pineqaatissiisoqarsinnaasoq.