Inuk nunanut allanut tunivaat

Mike Magidsonip torrallataa ”Inuk” nunani allani filmertarfinni takutinneqartussanngorpoq nunatsinni illoqarfinni arlalinni takutinneqareerluni. Maanna Cannes-imi filminik nuisitsinermi nunanut allanut siammarterisarsut isumaqatiginiarneqarput.
Allattoq Noah Mølgaard
maajip 23-at 2012 11:38

Korea-mi, Tysklandimi, Østrig-mi Schweiz-imilu filmertartut nukappiaraq Inuk, piniartoq Ikuma peqataasullu allat takusussanngorpaat filmi "Inuk" nunani tamalaani 20-it missaanni nersornaatisereersoq nunani taaneqartuni takutinneqartussanngormat. Pilersaarutit iluatsissappata nunani allani aamma takutinneqassaaq Cannes-imi filminik nuisitsineq sapaatiuppat naammassitinnagu isumaqatigiissutit iluatsissappata.

Nunatsinni filmip takutinneqartarnerani Aasianni, Sisimiuni, Nuummi Ilulissanilu 4.000-it missaannit takuneqareerpoq maannalu sulissutigineqarpoq filmiliorfiusumi Uummannami takutinneqarnissaa. Filmiliortitseqatigiit neriuutigaat nunatsinni illoqarfinni allani filmi taanna suliarilluagaasoq takutinneqarumaartoq avannaani assilisat kusanartorsuit takullugit.

Soqutiginnittut filmi aqagu Ilulissani takusinnaavaat Nuummilu Katuami maajip naanissaata tungaanut takuneqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq