Inuk naliliisartunit nersualaarneqarpoq

Filminik naliliisartut aamma nersualaarinnipput. Filmi marloriarlugu takutinneqarmat isiginnaarnissamut bilitsit tamarmik nungunneqarput.

Filmimi pingaarnertut inuttaritinneqarpoq nukappiaraq 16-inik ukiulilk Nuummi najugalik, ilaquttani paatsiveqanngitsumik inuusut qimallugit avannaanut aallartoq.

Kalaallit Nunaanni pinngortitap minguitsup nipaatsup filmimi takutinneqarnera eqqaamaneqartussaasoq, filminik naliliisartup Michael Burk naliliinermini allaaserivaa.

Inuk pillugu filmiliaq attortinnarpoq sakkortulluni, filmi isiginnaareerlugu sivisuumik eqqaamaneqartussaq, filminik naliliisartup Michael Burkip filmimik naliliinera, Woodstock Film Festivalip niitartagaani taamatut allaaserineqarpoq.

Filmimi inuttaasut kalaallisut oqalupput, taamaattumik USA-mi filminik nittarsaassinermi takutinneqarmat oqaaserineqartut tulluttut allagartalerlugit takutinnneqarpoq.

Filmi Uummannami immiussaavoq, kalaallit isiginnaartitsisartut arlaqartut inuttaaritinneqarlutik.

Filmimi Inummi ilitsersuisuuvoq amerikamiu Mike Magidson taanna filminik naatsunik marlunnik Kalaallit Nunaata avannaani immiunneqartunik filmiliornikuuvoq.

Filminik nittartaassineq Woodstock Film Festival, nunap inuuvisa filmiliaannik amerikami nittarsaassinerit annertunersaraat, USA-mi filminik sanaartortartut annertunerit avataatigut filmilianik nittarsaassinerulluni.