Inuk inatsisileritooq filmitut takutinneqassaaq
Canadami naggueqatigiit Inuit akornanni inatsisileritooq siullerpaaq pillugu oqaluttualiaq, taassumalu naggueqatimi Inuit pisinnaatitaaffiisa Canadap inatsisaanut sorsuuteqarsimanera pillugu filmiliaq Canadamiut TV-ianni marsip tallimaani takuteqqaarneqassaaq.
Filmimi kalaallisuunngorlugu ”Kiviap Canada akerleraa”-mik kalaallisuunngortinneqarsinnaasumi oqaluttuarineqarpoq inatsisileritooq maanna 71-nik ukioqartoq Kiviaq meeraatillugu arnaa qatanngutaalu niviarsiaraq nunaqarfigisaanniit Chesterfield Inlet-imiit Canadap kujasinnerusortaanut pinngitsaalillugit nuutsinneqarnerat.
Filmimi ilitsersuisuuvoq Zacharias Kunuk, taassuma filmi ”Atanaarjuaq” ajugaassutigisaminik filmiliarereerlugu Kiviap aviisini allaaserineqarnera takugamiuk aalangersimavoq piviusulersaarutitut filmiliariniarlugu.
- Kiviap inuunerata oqaluttuarineqarnera inatsisilerinikkullu naggueqatimi Inuit inuiattut akuerineqarnissaannut sorsuuteqarnera Canadami Eqqillit atugaannut naleqqiunneqarsinnaavoq, Zacharias Kunuk taama issuarneqarpoq.
Kiviap nammineerluni aamma neriuutigaa filmi aqqutigalugu naggueqatigiit Inuit Canadap oqartussaasuinit atugarliortitaanerat pillugu inuit paasisaqarumaartut.
- Uagut naggueqatigiit Inuit inuiaqatigiittut ataannarnissarput suli sorsuutigiuassavarput, Kiviaq CBC-News-mi taama issuarneqarpoq, nangipporlu:
- Inuiaqatigiinnut piuneerutitsiniartartut piuneerutitsiniarnertik qillarissarlugu taaguuteqartittarpaat ”ineriartorneq naleqqussarnerlu” Kiviaq maanna kræfterluni napparsimasoq taama oqarpoq.
