Umiuneq: Inuk II ajunaarfiungajattoq
Angallatip takornariartaatip Inuk II-p Ilulissat eqqaanni siorna aggustip 14-iani umiuneranik imaani ajutoorsimasoqartillugu paasiniaasartut misissuinermik inernera saqqummiuteqqammerpaat. Umiuneq ajorluinnartumik kinguneqarsimasinnaagaluartoq.
Angallatip iluarsartuunneqarnerata kingorna ruujorip immanniiaatip ikkuteqqinneqarsimannginnera umiunermut pissutaasoq misissuinermi inerniliunneqarpoq.
Ruujorilu immanniiaat amigaataammat ilaasut issorarmata kuuffiup isua immap ataaniilerpoq angallallu arriitsumik immakkiartulerluni.
Angallat aqunneqarsinnaajunnaartoq
Inuk II-mut ilaasut tassaapput Frankrigimit Italiamiillu takornariat 23-t, umiarsuarmi L'Australimi angalasuusut, inuttallu pingasut.
AAMMA ATUARUK Politiet roser den lokale undsætning og mandskabet på det forliste skib
Angallatillu naalagaata angallatip immakkiartornerani aqussinnaajunnaariartorpaa, radiukkullu ikiortissarsiulertoq nalunaarusiami allaaserineqarpoq.
Inuk II-p angallammit allamit kalitsilluni takornariartitsivimmukaanneqarnissaa naalakkap ikiortissarsiornermini siunertarigaluarpaa.
Angallat alla Inuk II-mut kalerriuteqartoq
Angallat alla, Clane-mik taaguutilik, ilaasuminik niuseqqammerluni ikiuiartorpoq, Inuk II-lu kiviartortoq kalerriutigalugu, ikiuukkiartortullu inuttaata Inuk II-p inuttai ilaasunik, umiarsuup qaavatigut nilleqisumik immalereersimasukkoortariaqartunik, qimagussortitsinerannik ikiorpaat.
AAMMA ATUARUK Havarikommission kalder forlis af turistbåd meget alvorligt
Ilaasoq ataaseq angallatip immanneratiguulerami uivilermat, inuttat angallatip aappaanut pinngitsaalillugu ikaartittariaqarsimavaat, qimagussuinermili ajoqusertoqanngitsoq nalunaarusiami aamma allaqqavoq.
Annaanneqarsinnaasimanissaat qularnartoq
Qimagussuinerup kinguninnguatigut Inuk II kivivoq.
Angallatillu sukkasuupilussuarmik kiviartornera pissutigalugu ilaasut angallatip annanniutai atorlugit annaanneqarsinnaasimanissaat qularnartoq nalunaarusiami erseqqissarneqarpoq.
AAMMA ATUARUK Ilulissani ilaasartaat kivivoq - ajoqusertoqanngilaq
Taamaammat angallatit allat Inuk II-mut ornigutipallallutik takornarianik 23-nik annaassinerat iluatsitsinertut taaneqarsinnaavoq.
