Kujataani annaassiniarnerit marluk: Inuk ataaseq ajunaarpoq ataaserlu suli ujaarineqarluni

Kujataani alianartunik ippassaq pisoqarfiuvoq.

Kalaallit Nunaanni politiit  Qaqortumi Narsamilu pisunut assigiinngitsunut marlunnut  annaassiniarput.

Narsami anaannaasup ernini 29-nik ukiulik Qaqortumiit Narsamukartoq tikinngimmat ernumagalugu Kalaallit Nunaani politiinut ippassaq pingasunut arfineq pingasunngortoq nalunaarutigaa.

29-nik ukiulik tallimanngornermi unnukkut Qaqortumit Narsamukarluni aallarpoq, arfininngornermilu ualikkut suli tikinngimmat anaanaasup politiinut nalunaarutigaa.

Ujaasineq Kalaallit Nunaanni politiinit aallartinneqarpoq,  ujaasinerlu ullumi sapaammi nanginneqarluni.

- Narsami innutaasunit ikiorneqarluarpugut tamannalu nuannaarutigisorujussuuarput.

-Issittumi sakkutooqarfimmit aamma ikiorneqarput, taakkua umiarsuaat Triton qulimiguuliutaallu Seahawk ujaaseqataapput, politiini pigaartut pisortaat Andreas Nordentoft oqarpoq.

Taassuma ilanngullugu nalunaarutigaa, angutip 29-nik ukiullip angallataa nassaarineqarsimasoq kisianni angut 29-nik ukiulik suli ujaarineqartoq.

Umiatsiaaraq kinngusoq 

Kalaallit Nunaanni politiit arfininngornermi ualikkut Qaqortup  eqqaani ajutoortoqarneranik nalunaarfigineqarput.

Umiatsiaaraq Qaqortup avataatigoortilluni sikumut aporsimagunarluni kinngusimasoq nalunaarutigineqarpoq.

Umiatsiaaqqamiittut angutit marlutik aappaa 43-nik ukiulik appaalu 65-nik ukiulik umiatsiaaqqap kinnguneratigut immamut katataapput.

- Qaqortumi innuttaasunit ualikkut pingasunngortoq nalunaarfigineqarpugut, taakkua qaqqamiit angutit marluk  immami 200 300 meterisut avasitsigisumiittut takusinnaasimavaat.

- Angutit marluk immamiittut annaanniarlugit Qaqortumi innutaasut amerlasuut avalakaapput, angutillu annaanneqarlutik Qaqortuliaanneqarlutik politiini pigaartoq oqaluttuarpoq.

Angut 43-nik ukiulik immamit qaqinneqarmat uumasimanngilaq kingornalu nakorsamit toqusimasutut nalunaarutigineqarluni.

Angut 65-nik ukiulik annikitsuinnarnik ajoquserpoq napparsimmavimmiillu angerlarluni. 

Qaqortumi innuttaasut ikiuiartorasuarnerat Kalaallit Nunaanni politiinit qujassutigineqarpoq.

- Innuttaasut qisuariapallannerat  pissutaalluni angutip aappaa annappoq. Taamaattumik innuttaasut iliuuseqapallannerannut nersorinninnerput politiinit oqaatiginiarparput, politiini pigaartut pisortaat oqarpoq.