Inuk aningaasarsiorluaraluartoq piitsuussusermik misigisimasinnaavoq

- Piitsuussuseq aningaasaateqannginnermut kisimi tunngassuteqanngilaq, Isumaginninnermut Naalakkersuisoq Maliina Abelsen oqarpoq, piitsuussuserlu pillugu oqallittoqarnissaa kaammattuutigalugu.

Nalunaarusiap saqqummiunneqarneratigut innuttaasut piitsuususeq pillugu oqallinnerulernissaannik kinguneqassasoq neriuutigivara, piitsuussusermi aningaasaatikinnermik kisimik tunngaveqanngilaq, Isumaginninnermut naalakkersuisoq Maliina Abelsen oqarpoq. Ilinniarsimassutsikkut, peqqissutsikkut inuillu akornanni piitsuussusermik qanoq paasinnittoqartarnersoq aallaavigineqarluni nalunaarusiaq allaaserineqarpoq, nalunaarusiamili Kalaallit Nunaanni piitsuussuseq tamakkiisumik qulaajarneqanngilaq.

- Inuup inuulluarnermik misigisimanissaanut piitsuussusermillu misigisimannginnissaanut pingaaruteqarluinnartut nalunaarusiami tikkuarneqarput, soorlu inuk najugarisaqanngippat, ilinniarnissaminut periarfissaqanngippat, pisortatigut ikiorserneqarnissaminut periarfissaqanngippat taava inuk piitsuussusermik misigisarpoq, naak inuk akissarsiatigut aningaasarsiorluaraluartoq, piitsuussusermik misigisimasinnaavoq, Isumaginninnermut Naalakkersuisoq Maliina Abelsen oqarpoq.

Nalunaarusiami innuttaasut qanoq amerlatigisut piitsuussusermik misigisimanersut ersersinneqanngilaq aamma inuit qaqugukkut piitsuussusermi inuuneqartarnersut nassuiarneqanngilaq, tamannami ajornakusoorpoq.

- Nalunaarusiami piitsuussusermut killigititaliortoqarsinnaanersoq misissorneqarpoq, kisianni tamanna ajornakusoorpoq, tassami piitsuussuseq assigiinngitsorpassuartigut misigineqartarpoq. Immaqa pingaarneruvoq inuit qanoq inuunerissaarnerulersinnaanerat eqqartussallugu, Isumaginninnermut naalakkersuisoq Maliina Abelsen oqarpoq. Nassuiaallunilu Naalakkersuisut piitsuussuseq akiorniarlugu assigiinngitsunik iliuuseqartut, soorlu meeqqat inuusuttuaqqallu atugarisaatigut aamma atuartitaanerisigut. Kisianni piitsuussuseq pillugu innuttaasut oqallittariaqarput.

- Siunissami inuunerissaarnissamut akissaatikinnerulersussaavugut, tassami aningaasaateqarpallaanngilagut aamma siunissami utoqqalisussat paaqqutarineqartussat amerlapput, soorlu utoqqalinersiutisiaqartitsinikkut, inuit amerlanerpaat inuunerissaarnissaat pillugu oqallittariaqarpugut, aamma akileraartarneq atugarissaarnerlu pillugu ataatsimiitsitaliarsuup nalunaarusiaa saqqummerpat oqallisigisariaqassavarput, Maliina Abelsen oqarpoq.