Ullumikkut tusagassiortunik katersortitsinermit assi. Tusagassiortut inimiinngillat silataaniillutillu nakorsaanerlu videokkut peqataavoq.Assi: KNR

Inuk alla coronavirusimik Nuummi aamma tunillatsissimasoq

Misissukkat 41-t akissutersineqarput taakkunanngalu ataaseq tunillatsissimasoq paasineqarpoq.

Nunatsinni tunillatsissimasoq alla paasineqarpoq. 

Tamanna nakorsaanerup coronap kipiluttunarnera pillugu ullumikkut katersortitsinermi oqaatigaa.

Nuummi inuit katillugit qulit coronavirusimik tunillatsissimapput - taakkunannga marluk peqqisseqqittutut nalunaarutigineqarput.

Tunillatsissimasutut ullumi uppernarsarneqartoq tunillatsissimasutut “ilisimariikkatsinnit” tunillatsissimavoq, nakorsaaneq, Henrik Hansen oqarpoq.

- Tunillatsissimasup angerlarsimaffimmini mattusimareersup ilaquttani tunillassimavaa, nakorsaaneq oqarpoq.

- Nuup avataani tunillatsittoqarsimasinnaaneranut takussutissaqanngilaq.

Tunillatsissimasunit arfineq-pingasunit napparsimarujussuartoqanngilaq, napparsimmavimmilu uninngasoqarani.

Sapaatip-akunnerani matumani tunillatsittut nutaat arfinillit

Coronamik tunillatsittut sapaatip-akunnerani matumani amerlanerpaapput: Sisamanngornermi tunillatsissimasut pingasut nalunaarutigineqarput, pingasunngornermi ataaseq marlunngornermilu ataaseq illoqarfiit pingaarnersaanni tunilatsissimasutut paasineqarlutik.

Nunatsinni misissorneqartut katillugit 321-upput. Misissugassatut tiguneqartut tamarmik Statens Serum Institutimut Københavnimiittumut nassiunneqartarput. Tamanna piffissamik atuiffiusarpoq - soorlu ullumikkut Nuummi apilluni anorersuarnerani timmisartut angalasinnaanngillat.

- Misissuisarnermut atortorissaarutinik qaqugu pissarsissatsinnut neriorsuineqanngilaq. Ingerlalertortitserusuppugut, tassami ullumikkut misissukkanik kinguaattuungaatsiartoqarpoq, nakorsaaneq, Henrik Hansen oqarpoq.

AAMMA ATUARUK Tamaat isigalugu: Coronavirus pillugu killiffik

- Tamanna unammillernarpoq. Pisiortorfigisatta atortorissaarutit poorskertinnagu tigussagigut oqaatigaa, ilumulli taamaattoqassanersoq arlaannaanit ilisimaneqanngilaq. Nappaasoqarneranut akiuiniartoqarnerani atortorissaarutinut tunngasut tamarmik qulakkeersimanngitsut ilisimavarput.

Peruluttut uninngavissaat sisamat

Dronning Ingriup Napparsimmavissuani peruluttut uninngavigisinnaasaat sisamaannaapput. Napparsimasut amerlanerulissagunik anersaartuutinik amerlanerusunik pissarsisoqarsinnaavoq. Napparsimasulli isumagineqarnissaanut sulisussarsiniarnissaq ajornartorsiutaavoq.

- Napparsimavallaanngitsunik isumaginnittussat ukkataraagut - taakkumi amerlassapput, nakorsaaneq oqarpoq.

AAMMA ATUARUK ASSILIARTAT: Coronavirusi timimi ima iliortarpoq

Paarlattaasussanik danskinik pissarsiniarsarisoqarpoq, tikittussaagaluartut ilaat sulisitsisuminnit danskinit aallannginnissamik piumaffigineqarput, nakorsaaneq oqarpoq.

- Taakku aallaqqusaasinnaanissaat noqqaassutigaarput. Napparsimangaatsiartulli amerlissagaluarpata unammillernartoqangaatsialissaaq.

Isummersuutit