Inuit utoqqartaat filmimi isummersorput

Silap pissusaata allangornera oqallisigineqartuarpoq, qaqutigoorporli naggueqatigiit inuit utoqqartaasa isumaannik aperineqartarnerat, maannali taamaliortoqarpoq.

Filminik ilitsersuisartup Canadamiup Zacharias Kunup Igoloolimmeersup utoqqaat isumaat pillugit filmiliaa ippassaq takuteqqaarneqarpoq.

Filmi taaguuteqarpoq, inuit ilisimasaat aammalu silap pissusaata allangornera. Filmi taanna qarasaasiakkut isiginnaarneqarsinnaavoq aammalu Canadami filmit nittarsaanneqarneranni takuneqarsinnaalluni.

Naggueqatigiit Inuit utoqqartaasa meeraanerminniit silap qanoq innera takuniarlugu anisarput.

Silap qanoq innera takusarpaat, pinngortitallu suniarnera paasisarlugu.

Maannakkut silap pissussaata allanngorneratigut paatsiveerusimasarput.

Anorit sammivii allanngorput, uumasut pissusissarinngisaminnik pissusilersorput, nunaqarfiillu ilaat qarsutsinernik nalaanneqarnissaminnik ulorianartorsiorput.

Utoqqaat filmimi takuneqarsinnaasut ernumanertik eqqumiilliornertillu pillugit oqaluttuarput.

Seqineq nalinginnaasumik nuigaangami nuiffigisartakkaminit allamit nuisalernera ullorissallu inissisimaffigisartakkaminnit allamut nuussimasutut innerat utoqqaat filmimi oqaluttuaraat.

Nunarsuup kaavittuata qitermigut sulloqutaa nuussimanerarlugu utoqqaat arlaqartut isumaqarput.

Nunarsuup kaavittuata qitermigut sulluqutaata nuussimaneranik oqalunneq Zacharias Kunuup utoqqarnit arlaleriarlugu tusartaramiuk, ilisimatuunut pikkorinnernut tusarniarpaa, qulakkeerniarlugu ilumut taamaattoqarnersoq.

Ilisimatuut qulakkeerlugu oqaluttuaraat nunarsuup kaavittuata qitermigut sulloqutaata inissisimanera allanngorsimanngitsoq, taamatullu isikkoqalersinnaasoq, qaamanerit qinngornerisa allanngornerat pissutaallutik.

Silap pissusaata allanngoriartornerata suneqarsinnaannginnera, akueriinnarlugulu naleqqussarfigisariaqarlugu utoqqaat filmimi oqaatigivaat.

Zacharias Kunuup filmiliaa Inuit ilisimasaat aammalu Silap pissusaata allanngornera Canadami takutinneqarmat nuannarineqarluarpoq.