Inuit ussersuutaat pisortatigoortumik akuerineqartut
Angutip tusilartup 38-nik ukiullip tuluit ussersuutaannit allaanerusunik atuisup
eqqartuussaanerata kinguneranik tamanna pivoq. Bobby Suwarak tallimanilli ukioqarluni tusilartunngorsimasoq atuarnermik, allannermik tuluilluunniit tusilartut ussersuutaannik ilinniarsimanngilaq. 2004-mi arneriniarsimasutut unnerluutigineqarluni eqqartuunneqarpoq.
Akilinermiut tunngaviusumik inatsisaat naapertorlugit eqqartuunneqartoq naapertuilluartumik pineqartussaammat Bobby Suwurakimik illersuisussaagaluit tunuarsimapput.
Tamatuma kingorna tusilartut ussersuutaannik immikkut ilisimasallip, Dr. Jamie MacDougall-ip ussersuutit atorlugit Nunavumi inuit tusilartut paaseqatiginiarnerini paasisimavaa ulluinnarni inuunerminni ussersuutit aalajangersimasut, allaganngorlugilli paasissutigineqarnikuunngitsut pisortanillu akuerineqarnikuunngitsut, atorneqartut.
Dr. Jamie MacDougallip ussersuutit pillugit misissuinerminik ineriartortitsinera tunngavigalugu maanna naggueqatigiit Inuit tusilartortaannut ussersuutit tunngaviusumik atorneqartussat nalunaarsorneqarput pisortatigullu akuerineqarlutik, soorlu Amerikami eqqillit Australiamilu aboriginalit tusilartortaasa ussersuutaat aamma pisortatigoortumik akuerineqarnikuusut.
Jamie MacDougall akilinermi aviisimut Globe and Mailimut oqarpoq, assut iluarisimaarlugu suliani ussersuutit pisortatigut akuerineqarnerannik kinguneqarmat.
-Ussersuutit atorneqartuarsimapput, Nunavumilu tusilartut inuiaqatigiinnut akulerulluarsimallutik, maannakkulli aatsaat pisortatigoortumik akuerineqarput, Jamie MacDougall naggasiivoq.
Suliap aallartinneqarneranut pissutaasoq, Bobby Suwarak aamma eqqissiallassinnaanngorpoq, sapaatimmi akunnerani qaangiuttumi unnerluussinerugaluup suliarineqarnerata sivisuallaarnera pissutigalugu taamaatiinnarneqarpoq.
