Inuit toqujaarnerusalerput
Inuunerulli sivisussusaa qiviaraanni suli annilaarnartoqarneruvoq, Canadamimi innuttat agguaqatigiissillugu 80-inik ukioqalertartut naggueqatigiit Inuit agguaqatigiissillugu 68-iinnarnik ukioqalertarput, tassa naggueqatigiit Inuit ukiunik aqqaneq marlunnik inuunikinnerusarput.
Inuit Taperiit Kanatami siulittaasuat, Mary Simon oqarpoq, inuiaat allat 1946-mi inuunertunikitsiginerattut naggueqatigiit Inuit ullumikkut inuunertunikitsigisut. – Canadian Pressimullu nangilluni oqarluni:
- Taamanikkut peqqinnissamut isumaginnittoqarnikuunnginnera eqqarsaatigalugu kisitsisit tupaallannaqaat. Ullumikkut akilinermiut Inuit Egyptenimiusut Dominikanerilluunniit kunngiitsuuffeqarfianni inuiattut inuunerat sivisutigisarpoq.
Naatsorsueqqissaartarfimmi paasissutissanik suliarinneqataasoq ilisimatooq, University of Torontomeersoq oqarpoq, Inuit agguaqatigiissillugu taama inuunikitsigisutut nalunaarsornerannut peqqutaasoq meeqqat inuusuttullu toqusut amerlanerujussui. Meeraaqqat toqusarnerat akuttornikuugaluartoq, suli Canadap kujataani meeraaqqanut toqusartunut sanilliullugit avannaani meeraaqqat toqusartut sisamariaammik amerlanerupput.
Avannaani naggueqatigiit Inuit akornanni peqqinnissaqarfiit pitsaavallaannginnerat peqqutaaqataagaluartoq, aamma inuusuttut akornanni isumaginninnermut attuumassuteqartut kisitsisit annilaarnarnerannut peqqutaaqataapput, ilisimatooq oqarpoq.
Mary Simon ilisimatuumut isumaqataagaluarluni, oqarpoq naggueqatigiit Inuit akornanni angerlarsimaffiit peqqinnarnerulernissaat ilinniartitaanerullu pitsanngorsarnissaa ajornartorsiutit anigorniarnissaannut aqqutissaasut.
- Naatsorsueqqissaartarfimmiit nalunaarusiap qanoq iliuuseqarsinnaanngitsutut misigitippaanga, ulluni taamaattuni misiginartarmat soorlu sunik siuariartortoqanngitsoq, Mary Simon Canadian Pressimut oqarpoq.
