Inuit timersuutaat OL-imi

2020-imi OL-ertoqarnissaanut atatillugu OL-ip Københavnimiinnissaanik aasaru aalajangiussisoqassappat, Kalaallit Nunaata Timersoqatigiiffiisa Kattuffiata inuit pinnguaataat takutitsinertut timersuutaanissaat angunialerpaa.

- OL-imut soqutiginaateqarsinnaasut eqqarsaatigivakka soorlu; 2009-imi Københavnimi OL kongres-ertoqalerpat issittumi suut pinnguaataanersut taakkununnga takutissallugit. Issittumi inuugaluarluta aamma issittumi assigiinngitsunik timersuutinik peqartugut, taannartaa avammut takutikkusullugu isumataarutigisimavara, Nuka Kleemann oqarpoq.

- Assersuuteqarsinnaavit sorpiaat pinnguaatit pineqarnersut?

- Ukua soqutiginarnerit eqqarsaatigivakka; Pakassumminnerit, qummut pissilluni isimmitseriarnerit soorlu talerpimmik isimmikkukku isikkavit talerpianik aamma tuttariaqarluni, taavalu ataatsikkut isimmitsigaanni ataatsikkut tuttariaqarluni, taavalu timmisartuusaarnermik pisagaat. Timersuutit assigiinngissutaat aamma takutikkusullugu, taakkua eqqarsaatigivakka siunnersuutigilersaarlugit, Nuka Kleemann oqarpoq.

- Taamatut avammut timersuutit taakku takutinnissaat pingaartipparsi sooruna?

- Pingaartuuvoq taamatut nunarsuarmioqatigiinnitsinni nutaaliaasumi timersuutitoqqat takutinnissaat, timersuutit qanganisaagaluarlutik ullutsinnut naleqqussarlugit taamatut avammut issittormiut pinnguaataat takutinneqarnissaat, ukua timersuutit nutaaliaanerusut unammillersinnaagatsigit taamaalillugu, Nuka Kleemann oqarpoq.

- Taamatut takutitsisoqassagaluarpat nunatta qanoq iluaqutigisinnaavaa?

- Nunattaannaanngitsoq kisianni issittumi inuit pinnguaataat taamatut saqqummiunneqassagaluarpat kusanassagaluaqaaq takutissallugu aamakkua uagut issittumi pinnguaatigisartakkavut, taama oqarpoq Kalaallit Nunaata Timersoqatigiiffiata

Kattuffiani siulittaasoq Nuka Kleemann.

Isumassarsiaq taanna Nuka Kleemannip Arctic Winther Games-eqarneranut atatillugu isumassarsiaraa.