Inuit timersuutaannik pissartanngorniuttoqassaaq

Pakassumminneq, qiterlerminneq, qummut pissilluni isimmitseriarnerit, tallikkut nissukkullu kivinneqarluni sivisuneqqisaannerit, ilaatigut tamakkuupput unammissutigineqartussat, Inuit Indianerillu timersuutaannik Nunarput tamakkerlugu peqataaffigineqartumik Narsami qanittukkut unammersuartoqalerpat.

Allattoq Elisa Isaksen

septembarip 27-at 2009 17:29

Tamakkua Narsap Timersortarfiani oktobarip aallaqqaataaniit sisamaata tungaanut, Narsami peqatigiiffik Inuit & Dene Games aaqqissuisoralugu unammissutigineqassapput. Unammeqataasussat 47-t Narsaliarnissaat naatsorsuutigineqarpoq, taakku taamaalillutik kulturikkut kingornussatsinnik ingerlatitseqqeqataassallutik.

- Nunatsinni pissartanngorniunnissap Narsamiitinneqarnissaa nuannaarutigisorujussuuarput. Peqatigiiffipput ilaasortakitsunnguuvoq, maanilu unammersuartitsinissaq uatsinnut unamminartuulluni. Qujanartumilli nammineq piumassutsiminnik ikiuuttunit ikiorneqarluarpugut, soorluttaaq Kommune Kujallermit, Narsami Kulturimut Sunngiffimmullu ingerlatsivimmit, INUILI-mit, Narsaq Youth Hostel-imit tapersersorneqarnitsigut piareersarnerput naammassingajalerparput.

Pissartanngorniunnissamut qilanaartorujussuuvugut, neriuutigaarpullu isiginnaariarpassuit takkuttarumaartut timersortarfimmilu unammisut malinnaavigalugit, taama naggasiivoq Narsami peqatigiiffiup siulittaasua Nikolaj Poul Korneliussen.

Inuit timersuutaannik pissartanngorniuttoqassaaq

Aamma atuaruk