Inuit Tapiriit Kanatami ukiuni 40-ni

Nuna tamakkerlugu naggueqatigiit Inuit Kattuffiat, Inuit Tapiriit Kanatami, ITK, sapaatip-akunnerata tulliani ukiunik 40-nngortorsiussaaq. Tassunga atatillugu Canadap illoqarfiisa pingaarnersaanni, Ottawami, naalagaaffiup katersugaasivissuani ulluni pingasuni ataatsimeersuartoqarlunilu nalliuttorsiualaartoqassaaq. Canadami Nunavimmi, Nunavummi, killiunerusunilu Inuivalunni, aamma Nunatsiavummeersunik, inunnut 56.000-nut ITK sinniisuuvoq.

Tagak Curley aamma Meeke Kilabuk, kattuffimmik ukiut 40-t matuma siorna aallartitseqataasimasoq, ilaatigut peqataassapput.

Nunami maani inuit "Eskimo"-nik ukiut 40-t matuma siorna taaneqartaraluarput, Ottawamilu nuna tamakkerlugu suliniaqatigiiffimmik taakku aqutsinerat malunnaateqanngingajammat amerlasuunit ilisarisimaneqanngillat, naalakkersueqataanermilu pimoorunneqanngivillutik.

Ataatsimeersuarnerulli qulequtaa, "ukiuni 40-ni Eskimomiit Inummut",  nukittuumik pitsaasumillu ineriartortoqarsimaneranik naqissusiivoq.

ITK-mi præsidenti, Mary Siomon, Radioaviisimut oqarpoq, Issitttoq avataanit tatineqarnerminit pissuteqartumik maanna ajornartorsiortoq, silap pissusaata allanngoriartorneraniit pisuussutinik ineriartortitsinissaq pillugu politikikkut isummertarnerup allangorarnerinut.

- Taamaattumik pingaaruteqarluinnarpoq kingumut qiviarluni ukiuni 40-ni sunik angusaqarsimanerput paasissallugu, uagullu ineriartornissamut suliniuteqarnissamullu akuersaartuunerput, aamma uagut siunissarput, Canadap siunissaani pingaruteqarluinnartumik inissisimasuunera aamma ilisimassallugu, Mary Simon oqarpoq.

Ataatsimeersuarnissaq nuannannissarlu Ottawami marlunngorpat aallartinneqassaaq.