Inuit suleqatigiiffii aggersarneqarsimanngillat

Issittup imartaani upalungaarsimanissaq pillugu, Canadami nunanut allanut ministerip Lawrence Cannonip, nunat issittumi siunnersuisoqatigiivini ilaasortat arfineq pingaasut taakkunannga nunat tallimat, marsip qaammataata naalernerani Canadamut ataatsimiigiaqquai, minitaqarsimappulli.
Allattoq Jaaku Lyberth
februaarip 22-at 2010 16:33

Nunat Issittumi siunnersuisoqatigiit ilaasortaasa ilai, suliniaqatigiiffiillu Inuit Kattuffii ataatsimiinnissamut aggersarneqannginnerat eqqumiigineqarpoq. Ukioq 2008-mi Issittup imartaani isumannaallisaaneq pillugu Ilulissani ataatsimiittoqarmat, ICC aggersarneqarpoq tamannalu iluarisimaarneqarluni.

2008-mi Qallunaat naalagaaffiat ataatsimiinermut aaqqissuussivoq aggersaasuullunilu. Maannakkut Canadap nunanut allanut ministereqarfia ataatsimiinnissamik aaqqissuussivoq aggersaallunilu. ICC-mit eqqumiigineqarpoq, ICC-mi nunat ilaasortat issittumi imartaqarnersaammata ICC aggersarneqanngimmat pakatsinartinneqarlunilu.

Canadap nunanut allanut ministeriata ICC aggersarsimanngimmagu, ICC-p siulittaasua aqqutigalugu ICC avoqqaarliuteqarpoq.

Nunat tamalaat akornanni issittumi pissutsit pineqartillugit Issittormiut Siunnersuisoqatigiit aammalu nunat inoqqaavi peqataatinneqartarput, taamaattumillu Canadami ataatsimiinnissami peqataarusunnerat Naalakkersuisut siulittaasuata Kuupik Kleistip paasisinnaalluarpaa.

- Inuit oqartussaaqataarusukkamik, Kuupik Kleist oqarpoq.

Canadami nunanut allanut ministerip Lawrence Cannon-ip nunat tallimat: USA, Canada, Norge aamma Rusland, kiisalu Danmark Canadami marsip qaammataata naalernerani ataatsimeeqatiginiarlugit maanna aggersarpai. Naalakkersuisut siulittaasuat Kuupik Kleist ataatsimiinnissamut peqataassaaq.

Naalakkersuisut siulittaasuata ataatsmiinnissamut aggersarneqanngitsut pillugit danskit nunanut allanut ministereqarfiat oqaloqatiginiarpai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq