Inuit siuttuusinnaanersut uppernarsarniarlugu aningaasat 6 millionit atorpaat

Ilisimatusarnermut pilersaarummi ukiuni arfinilinni ingerlanneqartussami naggueqatigiit inuit kulturianni aqutsineq misissuiffigineqassaaq. Tamanna Lavan Universitymi Iqalunnilu Nunavut Arctic Collegemi pissaaq inunnik isumaginninnermut aningaasaqarnikkut siuarsaanermut Nunat avannarliit ataatsimoorussaattut taallugu. Suliassatut pilersaarut taanna Ottawami naalakkersuisunit 6 mio. kr.-inik aningaasartalerlugu taperserneqarpoq.

- Nunavut pilersinneqarmalli ukiut aqqanillit kingulliit ingerlaneranni paasinarsisutulli inuit kulturiat, oqaasii oqaluttuarisaanerallu Nunavummi aqutsinerup paasineqarnissaanut pingaarutilimmik ilaasussaasut, Gary Goodyear ilisimatusarnermut teknologimullu ministerip tullia Nunatsiaq Onlinemut oqarpoq. Pilersaarut ilaatigut atuakkanik atuartitsinermullu atortunik nunani issittuni ilinniarnertuunngorniarfinni atugassanik kinguneqassaaq. Atuakkat ilaat ataaseq sapaatit akunneri qassissunnguit qaangiuppata saqqummeriissaaq taaguuteqarlunilu "Inuit arnartaat siuttuunermi aqutsinermilu".

Suliassatut pilersaarummi tamatuma saniatigut inuiaqatigiinni aqutsinermi siuttuunermilu inunni qangaaniilli periaatsit uppernarsarneqassapput ilisimatusarneq aammalu Nunavummi Nunavimmilu utoqqarnik apeqqarissaarneq aqqutigalugu.