Issittumi aatsitassarsiorneq ikummatissanillu iluaquteqarniarnermi innuttaasutut soqutigisat oqartussaaqataanittalu siunissami qanoq qulakkeerneqarsinnaanerat, ataatsimiinnermi oqaluuserisassat pingaarnerit ilagaat.
Inuit Issittormiut Siunnersuisoqatigiiffiata Nuummi siorna aasakkut ataatsimiinnerani, Nuummi Nalunaarut pilersinneqarpoq, Inuit Issittormiut Siunnersuisoqatigiiffiat tassani immikkut piumaffigineqarluni Inuit Leaders' Summit on Resource Development aaqqissuuteqqullugu, naggueqatigiit Inuit qinikkatut qullersaat Canadamit, Alaskamit, Tjukotkamit Nunatsinniillu aggersarneqarlutik. Issittumi aatsitassarsiornikkut ullumikkut piorsaanerujussuaq, oqaluuserisassani pingaarnersaavoq, aamma naggueqatigiit Inuit ineriartornermi soqutigisaat qulakkeerneqarsinnaassasut, kiisalu ineriartornermi sukkaqisumi naggueqatigiit Inuit oqartussaaqataanerat qanoq qulakkeerneqarsinnaanersoq.
Ataatsimiinneq pingasunngorpat sisamanngorpallu pissaaq. Immikkut ilisimasallit ulloq siulleq saqqummiisinneqassapput, naggueqatigiillu Inuit siuttui kisimik ulloq kingulleq isumasioqatigiissallutik.
Ataatsimiinneq Canadami Peqqissutsimut ministerimit, Leona Aglukkakimit, aamma naalakkersuisunut siulittaasuannit Kuupik Kleistimit ammarneqassaaq.