Inuit sisamaagaangata ataaseq akuutissamik PCB-mik navianartorsiorpoq

Illuliornermi akuutissamik PCB-mik nunatsinni atuisoqarsimanera tunuliaqutaralugu, inuit sisamaagaangata ataaseq PCM-mik navianartorsiortoq, atuagassiaq Ingeniøren aqagu saqqummersussamit taama allaaserisaqarpoq.
Allattoq Jaaku Lyberth
apriilip 30-at 2009 11:32

Illuliornermi akuutissat ilaat PCB peqqinnissamut navianartuusoq 1950-ikkunni 60-ikkunni 70-ikkunnilu nunatsinni sanaartornernut atorneqarsimavoq. Nutaarsiassaqartitsiviup Ingeniøren kisitsisinik 1955-miit 1976-imut inissiat, illut allallu nunatsinni sanaartorneqarsimasunut allassimaffiit malillugit, naatsorsuisimanermit ersersitsivoq.

Piffissap taassumap iluani nunatsinni 9.000-inik sanaartortoqarsimavoq, tamatumanilu akuutissaq PCB atorneqartorujussuusimalluni. Maannamut inissiat allallu 1.200-sut isaterneqareersimalerput, ullumikkulli inissiat, illut allallu 8000-sut suli atorneqarlutik. Ilisimannittut aallaavigalugit inuit 56.000-isunit sisamararterutaasut inissiani taakkunani najugaqartuupput.

Sisimiuni Ingeniøretut siunnersuisarfik Rambøll aallaavigalugu sanaartukkat 8000-isunit akuutissamik PCB-mik akoqarnissaat ilimagaa. Atuarfiit, allaffiit, napparsimaviit aalisakkeriviit, nukissiorfiit allallu taamani sanaartorneqartut ilagaat.

1965-imiit 1975-ip tungaanut sanaartornerup sukkanerpaaffiani inissiat illut allallu sanaartorneqartut ulloq manna tikillugu suli atorneqarput. Nuummi Blok S,R Q-lu isaterneqarput, tassanilu akuutissaq PCB nassaarineqarpoq.

PCB 1976-imi atorneqarunnaarpoq.

Ullumikkut ilisimaneqarpoq akuutissaq PCB kræftinnguutitsisartoq, tingunut, sianiutinut timip nappaamut akiussutissaanut toqunartoqartoq.