Toqqorsivimmit assiAssi: KNR/Jonas Løvschall-Wedel

Trudeau utoqqatserpoq: Inuit sakialluummik nappaateqartut pinngitsaalillugit aallartitaasarsimapput

Canadap ministeriunerata Trudeaup naalakkersuisui politikkikkut aaqqiagiinngissuteqarfimmiipput. Ministeriuneq taamaakkaluartoq Nunavut illoqarfiisa pingaarnersaannut Iqalunnukarluni naggueqatigiinnut inunnut 50-ikkunni sakialluummik napparsimallutik kujataanut aallartinneqartarsimasunut utoqqatseriartorpoq.

Napparsimasut ilaat uteqqinngisaannarsimapput.

Canadami naggueqatigiit inuit nappaatip tunillaassuunnerata nalaani nungungajapput. Issittup kangisissortaani naggueqatigiit inuit affaat sinnerlugit ukiuni 1940-mit 1960-ip missaata tungaanut angerlarsimaffimminnit Canadap kujataani Montrealimi, Ottawami Quebecimilu napparsimmavinnut allarartinneqartarsimapput.

Aallartinneqartut amerlanerit ilaqutaannut kalerriutiginagit sumullu aallartinneqarnerannik ilisimatitsisoqarani aallartinneqartarsimapput.

Umiarsuaq napparsimmaviusoq, CD Howe, nunaqarfinnut minnerusunut 1959-ikkunni angalanermini naggueqatigiit inuit tarrarsortarpai napparsimasullu umiarsuarmut ilaatillugit aallartittarlugit.

Meeqqat angajoqqaallu avissaartinneqartarsimapput naggueqatigiillu inuit taamani kinguliaquteqannginnerat pissutigalugu inuit normunik kinaassuserneqartarsimapput, taamaammallu katsorsartereernerup kingornatigut ilaquttaminnik nassaarniarnerat amerlanertigut ajornartarsimalluni.

Naggueqatigiit inuit amerlasuut napparsimmavinni nunap kujataaniittuni toqupput amerlasuullu ilerri suli nassaarineqanngillat.

Ministeriuneq Trudeau naggueqatigiinnut inunnut taakkununngalu ilaqutaasunut iliuuserineqarsimasut pillugit maanna utoqqatseriartorpoq.

Tamatuma saniatigut napparsimasut pillugit nakorsartinnerallu pillugu allagaatinut paasissutissiivimmik naalakkersuisut pilersitsiniarnerat nalunaarutiginiarpaa, taamaalillutik ilaqutaasut ilaquttamik sumiinnerannik ilisimanninngitsut ujaasinissaannik ilerrinillu nassaarnissaannik periarfissinneqassallutik.

Nunavummi Nunavimmilu sumiiffinni arlaqartuni sakialluummik ullumikkut suli nappaalasoqarpoq, sakialluutilli naggueqatigiit inuit akornanni 2030-nngortinnagu nungutinneqarnissaanut inuit siuttuat Natan Obed qaammarsaanermik aallartitsivoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat