Inuit saarngi kinguaajusut iliversinnaanngorpaat
Itsarnisarsiuut inuit saarnginik misissorniakkaminnik angerlaassisarnerat, ukiut hunnorujut matuma siornatigut nalinginnaalluinnarpoq.
Amerikamiu itsarnisarsiooq William Duncan Strong aamma taamaaliortarpoq, 1927-milu qatanngutigiinniat nunaqarfeerannguannit Zoar-imit Paggivittamiittumit naggueqatigiit Inuit saarngi 22-t aallarussimallugit.
Naggueqatigiiit Inuit atii ilanngullugit sanningasulerlugit ujaqqanik ilerfinut 1880-kkunnili ilineqarsimapput. Amerikamiulli itsarnisarsiuup ilerrit eqqissisimatitaasussaanerat unioqqutimmagu, naggueqatigiinnit Inunnit tamanna paasineqarpoq, kingornalu naggueqatigiit Inuit pisoq politiinut angalasunut naammagittaalliuutigaat.
Naggueqatigiit Inuit saarngisa utertinneqarnissaat, tamatuma kingorna William Duncan Strong-ip neriorsuutigaa, taamaattorli paariinnarsimallugit, ilerrit iluarsartuunnissaat patsisitut oqaatigisimallugu. Kisiannili iliuuseriniakkami akerlianik naggueqatigiit Inuit saarngi 22-t nassarsarlugit Chicago-mukarsimavoq.
Saarngit katersugaasivissuarmut Field Museum of Natural History-mut inissinneqarput, kingornatigullu karsimut ikillugit toqqorneqarsimapput puiorneqarlutillu.
Ukiut pingasut matuma siornagut, nassaarineqarnissamik tungaanut tassaniittuarsimapput. Taamanikkullu itsarnisarsiooq inuusuttoq Jamie Brake, Naini-mut tikippoq, William Duncan Strong-illu allattugaatai misissorlugit aallartilluni. Itsarnisarsiuulli Chicago-milu katersugaasiviup ukiut 80-it matuma siornagut pisimasoq ajorluinnartoq paasivaat, taamaattumillu saarngit utoqqatsernermik ilallugit utertinneqarnissaat aalajangiunneqarluni.
Taamaalilluni oqaluttuaq sapaatip akunnerani kingullermi naammassineqarpoq, Nunatsiavummi kulturministerip naggueqatigiit Inuit saarngi 22-t nassarlugit Naini-mut tikimmat. Taamaalillunilu aqqi ilisimaneqarmata maanna ilaqutaasut siulitik pitsaasumik ataqqinartumillu ileqqissinnaanngorpaat.
