Inuit Qullissani nuannisarput
Qullissat ikinngutaasa komiteanni ilaasortaq, Dorthe Løvstrøm Mathiesenip inuppassuit tipaatsullutik nuannaarlutik pilluarlutillu pisut malunnarnerarpai:
- Inuppassuit tipaatsullutik malunnarput nuannaarlutik pilluarlutillu pisut, taava aamma nuannequtigisorujussuuaa nunatta isiginnaaritsisartui tikereernikuugamik. Nipilersortartut isiginnaartisisartullu maaniipput. Taava unnuakkut nipilersortarlutik nutsugiarpalaarlutik nuannersorujussuarmik ingerlapparput aasarsioqatigiinnerput maani, Dorthe Løvstrøm Mathisen Qullissat ikinngutaasa komiteanni ilaasortaq Qullissani maanna pisut pillugit oqarpoq.
Qullissat matuneqarneraniit ukiut 40-t maanna qaangiussimalerput. Ukioq manna Qullissani naapeqatigiinnermi pilluaatigalugu ingerlaqqitta qulequtarineqarpoq.
- Akuerisariaqaripput, Qullissani inunngortut nunaqarsimasullu uterfigeqqissinnaanngilaat. Angerlarsertuaannarnertik. Suunngitsutut misigisimaneq, nanertisimajuarneq, misigissutsit artornartut atortuakkatik qaangerniarnissaanut aqqutissiuinissamik, inuttullu ingerlaqqinnissaanik, imminut nalilittut akueralugu ingerlaqqinnissaat, taanna siunertaralugu aasaq manna naapeqatigiinnermi ingerlatsisoqarpoq, Dorthe Løvstrøm Mathiesen oqarpoq.
Naapeqatigiinnermi pisortatigoortumik ippassaq ullaakkut ammaanersiortoqarpoq, tassa erfalasumik amusisoqarluni ullaakkorsioqatigiittoqarlunilu. Unnukkut nunatta isiginnaartitsisartuisa ”Qullissara” siullermeerlugu takuteqqaarneqassavaat. Assigiinngitsunillu aaqqissuussinerit pigasunngornerup tungaanut ingerlanneqartassapput, soorlu erinarsoqatigiit nipilersortartullu tusarnaaritsisassallutik, nereqatigiinnerit arsamik unamminerit, taavalu bingo banko Qullissallu pillugu nunatsinni peqatigiiffiit pingasut ataatsimiititsiumaarlutik.