INUIT Quality Clothes akissarsitinneqartoq

Inuussutissarsiornermut Aningaasaateqarfiup akissarsiaritinneqartartoq pilersitsisunut/aallartitsisunut ukiuni kingullerni arlalinni agguaattarpaa, tassa inunnut ataasiakkaanut imaluunniit suliffeqarfinnut, ingerlatsinerminni sulilluarsimasunut, tunniusimalluartunut aamma malunnaatilimmik takutitsisimasunut tunniuttarpaa - ukiormannalu tassa INUIT Quality Clothes of Greenland nersornaaserneqarluni.

Nersornaat 25.000 koruuninik aningaasartaqarpoq.

Grønlandsbankip Inuussutissarsiornermut Aningaasaateqarfiani siulersuisuni siulittaasup Kristian Lennertip akissarsisitsineq ima tunngavilersorpaa:

- Arnat nukittuut marluk Inuussutissarsiornermut Aningaasaateqarfimmiit 2015-imi akissarsisikkumavavut pikkorillutik, eqiasuillutik niuillaqqillutillu aallartitsisimammata, tassa Aasianni, Sisimiuni, Qaqortumi aamma massakkut Nuummi niuertarfimmik ingerlatsinermik saniatigut, atisaliaq maanna ilisimaneqarlualersoq INUIT Quality Clothes pilersimmassuk.

Taakku pilersippaat ilisarnaat kalaallit anersaavannik nutaamillu takutitsinermik ataatsimoortitsisoq, Kristian Lennert akissarsititsinermut atatillugu taama oqarpoq.