Inuit Pisinnaatitaaffiinut Kalaallit Nunaata Siunnersuisoqatigiivi sap. ak. uani ataatsimiissapput
Inuit Pisinnaatitaaffiinut Kalaallit Nunaata Siunnersuisoqatigiivisa ataatsimeeqqaarnerini Nunatsinni inuit pisinnaatitaaffii aamma oqaluuserineqassapput. Sammisaq pillugu oqallittoqassaaq aammalu suleqatigiissitanik pilersitsisoqassalluni. Siunissaq ungasinnerusoq eqqatsaatigalugu suliassanik aallartisaassapput innuttaasunullu inuit pisinnaatitaaffii pillugit paasissutissanik siammarteralutik.
-Ungasinngitsukkut nunatsinni inuit pisinnaatitaaffiisa inissisimanerat pillugu nalunaarusiaq Danmarkimi Inuit Pisinnaatitaaffii pillugit Ilisimasaqarfimmit (Dansk Institut for Menneskerettigheder (IMR) suliaralugu siunnersuusiaq saqqummissaaq. Nalunaarusiassatut siunnersuut nalilersussavarput, nalilersuinittalu siunissami suliassatta unammilligassartaannik tikkuussinissarput ilimagisariaqarpoq, Hjalmar Dahl Siunnersuisoqatigiinni siulittaasoq oqarpoq.
Inuit Pisinnaatitaaffiinut Kalaallit Nunaata Siunnersuisoqatigiivisa 17-ersuarnik ilaasortaqartup ukiormanna pilersinneqarnerminni suliaasa ilagaat siunnersuisoqatigiit ilisarnaatissaanik unammisitsineq. Nunatsinni inuit amerlasuut siunnersuutinik nassiussaqarsimapput.
- Nuannaarutigeqisatsinnik soqutiginninneq annertoqaaq, pingasunngorpallu ataatsimiinitsinni ilisarnaaterpassuit tigusavut nalilersussavagut aalajangiiffigalugillu. Tamatuma kingorna kikkut ajugaanersut nalunaarutigineqarumaartoq, Hjalmar Dahlip naggataatigut oqaatigaa.