Inuit pisinnaatitaaffii pillugit aalajangersagaq naammassingajalerpoq
Inuit Pisinnaatitaaffii pillugit Naalagaaffiit Peqatigiit Geneve-mi aalajangersagaliorniarnerat naammassingajalerpoq.
Suleqatigiissitat januaarimi naggataamik ataatsimiissapput, taamaalillunilu nunat inoqqaavisa pisinnaatitaaffii pillugit aalajangersagaliorniarneq, ukiut 20-t sinnerlugit suliarineqarsimasoq, naammassisinnaanngussaaq. Permanent Forum aamma Naalagaaffiit Peqatigiit aalajangiisumik ataatsimeersuarneranni, nunat inoqqaavisa Naalagaaffiit Peqatigiinnit illersorneqaatissaannik aalajangersaasoqarnissaa tuavisaarutigineqalersimavoq.
Nunat inoqqaavisa, nunarsuarmi 300 milliuunit missaanniittut, inuttut pisinnaatitaaffiisa immikkut aalajangersaaffiginissaat pisariaqartinneqalersimavoq, nunat inoqqaavi apeqqutini pingaartuni imminnut illersorsinnaaleqqullugit, soorlu nunamik pisuussutinillu piginnittuuneq iluaquteqarsinnaanerlu pillugit, aamma inuit ulluinnarni atukkaminnut tunngasutigut politikkikkut aalajangiisinnaatitaalernissaat nammineersinnaatitaalernissaallu periarfissikkumallugu.
Nunatsinni ICC-p siulittaasuata, Aqqaluk Lyngep, ilisimatitsissutigaa, Danmarkip, Norgep, Canadap Mexicollu naalagaaffinnut allanut kimigiisernerisigut aalajangersagaq kiisami naammassineqassagunartoq.
- Nunat taakku tapersersuisimanngikkaluarpata suleqatigiissitap januaarip naalernerani ataatsimiinnissaa immaqa angusaqarfiussanngikkaluarpoq, Aqqaluk Lynge naliliivoq.