Inuit pisinnaatitaaffii nakkutigineqaqquai
Suliaqatigiiffiit amerliartuinnartut saqqummertalerput Nunatsinni inuit pisinnaatitaaffiit demokratilu iluamik malinneqarnersut misissorniarlugu. Tamanna qanoq iliuuseqarfigineqartariaqalersoq Sara Olsvig isumaqarpoq.
- Taamaattoqarnera ajunngilaq, Nunarpulli tamakkiisumik inuit pisinnaatitaaffii pillugit paasiniaasarfimmik amigaateqarpoq, Sara Olsvig oqarpoq.
Paasiniaasarfik pisortatigoortumik nakkutilliisinnaasoq pisariaqartinneqartoq Sara Olsvig isumaqarpoq, taannalu Naalagaaffiit Peqatigiinnut FN-imut nalunaaruteqartartussatut piukkuppaa.
Danmarkip Inuit Pisinnaatitaaffii pillugit paasiniaasarfiata nunatsinni pisussaaffini suliarisariaqarai Sara Olsvig isumaqarpoq, nunatsinni nammineq paasiniaasaqarfeqalernissaata tikitserlugu.
Inuit Pisinaatitaafii pillugit nunatsinni paasiniaasarfeqalernissaq, inatsisartut 2008-mi aalajangiiffigaat.
-Pingaaruteqarluinnarpoq Nunatsinnit folketingimut qinigaatitassatta danskit paasiniaasarfiata Nunatsinni suliaqartarnerminut malunnaateqartarnerunissaanik anguniagaqarnissaat, Olsvig oqarpoq.
Demokratiskimik ingerlatsinermi inuit pisinnaatitaaffii pillugit paasiniaasarfimmik atorfissaqartitsivugut Nunatsinni nammineq paasiniaasarfimmik pilersitsinissatta tungaanut, Sara Olsvig isumaqarpoq.
