Inuit Pinnguaataanni pissartanngorniuttoqaleruttortoq
Nuummi Nuussuup timersortarfiani sapaatip akunnerani timersorneq ataasinngornermi aallartinneqarpoq.
Timersortarfimmimi tassani Inuit Pinnguaataat 2023-mi pissartanngorniunnerat sapaatip akunnerani ingerlanneqassapput.
Pissartanngorniunnerit ukiut tamaasa aaqqissuunneqartarput, ukiormannalu nunatsinni illoqarfinnit nunaqarfinniillu timersoqatigiinnit aqqanilinnit peqataasoqarpoq.
Nuussuup timersortarfia sapaatip akunnerata ingerlanerani iserfigissagukku unamminerit assigiinngitsut isiginnaarnissaannut periarfissaqassaatit.
Unammisummi Alaskamiusut Qummut Isimmeriaanermi, Seeqqummerluni Pissinnermi, Pingasoqiusamik Pissinnermi, Qisuminermik Noqqoruunnermi ilaatigut unammissapput.
Arsaaraq meqqulik sunaluunniit isimminneqanngitsoq
Timersuummi isikkanik-marlunnik qummut isimmeriaaneq ataasinngornermi unammissutigineqarpoq – unamminermi tassani peqataasut puisip amianik arsaaraliaq isikkanik marlunnik isimmittussaavaat isikkaminnillu marlunnik toqqittussaallutik.
Timersuut taanna arfanniarnermit aallaaveqarpoq, tassami arfattoqarsimatillugu nalunaariartortoq nunaqarfimmut arpariarluni isikkaminik marlunnik silaannarmut isimmissaaq. Taamaaliortoqarneratigullu nunaqarfimmiut sumik piareersassanerlutik ilisimasarpaat.
Pissartanngorniunnerit maanna arfininngornerup tungaanut ingerlanneqassapput, taakkulu KNR2-kkut nalunaaqutaq 09.30-mit malinnaavigineqarsinnaapput.
