Inuit pillugit paasissutissat tuniniarneqartarput

Ullaaq radioaviisimi tusarliupparput, inuup normuinik Naalagaaffiup nalunaarsuisoqarfia Danmarkimi akiligassalinnik nalunaarsuisarfimmut RKI-mut inuit 2,5 miliuunit paasissutissaannik tunisisartoq.

Paasissutissallu tunineqartartut nunatsinni innuttaasut paasissutissartaannik ilaqarluarsinnaapput, Danmarkip naalagaaffiani innuttaassuseqartut paasissutissaat pineqarmata, Danmarkimilu inuttaasunik nalunaarsuisarnermi inatsit atuuttoq nunatsinni aamma atuummat. Kalaallit Nunaanni Danmarkimilu inuit normuinik inatsit ataasiuvoq, Leif Scharling, Namminersornerullutik Oqartussat nunami namminermi pissutsinut allafeqarfianni pisortaq ilisimatitsivoq.

RKI-p paasissutissat pisartakkani unnuit tamaasa nutartertittarpai. Inuillu akiligassallit akiliiumanngitsuinnaanngitsut aammali akiligassaqanngitsut ilanngullugit RKI-p alaatsinaatarai.

RKI paasissutissanik naalagaaffimmit pisiaminik aningaaserivinnut oqarasuuatinik ingerlatsiveqarfinnut sillimmasiisarfinnut suliffeqarfinnullu allanut katillugit 500-inut tuniseqqittarpoq.

Tamanna inuit normuinik nalunaarsuisoqarfiup paasissutissat kikkunnit pigineqarnerinik aqutsisinnaajunnaarneranik kinguneqarsinnaalluarpoq. Tamannalu pinngitsoortinniarlugu Danmarkimi paasissutissat pillugit nakkutilliisoqarfik Datatilsynet misissuinialerpoq. Tassani Rebersip paasissutissanik akissarsiutigalugu tunisisarnermini inatsit naapertorlugu iliornersoq aamma misissorneqassaaq.