Inuit oqaasiisa pisortatigoortumik atorneqalernissaat pilersaarutaavoq
Nunavummi Inuit oqaasiisa pisortatigoortumik atorneqalernissaannut aningaasartuutit annertugaluartut, tamassumap piviusunngortinneqarnissaa pilersaarutaavoq, taamatut oqarpoq Nunavumi inatsisartut siulittasuat Ed Picco.
juunip 09-at 2008 06:26
Inuit oqaasiisa illersorneqarnissaannut inatsisip atuutilernissaanut aningaasartuutit annertummata, inatsisartuni ilaasortat akuersinissaminnut nangaalersimapput.
Inuit oqaasiisa pisortatigoortumik atuutilernissaannut Canadamiut aningaasaat malillugit ukiumut 12-15 millioni dollarsinik naleqartussaavoq, nutaarsiassaqartitsivik Nunatsiaq News allappoq. Inatsisartut siulittaasuat Ed Picco oqarpoq, aningaasartuutissat missingersuusiornermi ilanngunneqareersut.
Nunavumi oqaatsit pillugit kommisæri Eva Aariak Inuit oqaasiisa pisortatigoortumik atuutilernissaannut ernumalluni oqaaseqarsimavoq. Eva Aaria, inuit oqaasiisa illersorneqarnissaannut inatsiliortoqarnissamik siunnersuuteqarpoq.
