Canada: Inuit oqaasii pillugit inatsit naammagineqanngilaq
Nunap inoqqaavisa oqaasii pillugit inatsisiliorneq Inunnut assut pakatsissutaavoq. Tassami oqaatsit Inuktitut neriorsuutigineqartutut illersorneqarnatillu siuarsarneqanngimmata.
Canadami Inuit siuttuat Natan Obed taama isumaqarpoq. Tusagassiuutinut nalunaarummini sakkortuuliortunik oqaasertalimmi oqaaseqarpoq inatsisiliorneq taanna saammaasseqatigiinnermik ataatsimullu ineriartornermik siunertaqartillugu pilersitaagaluartoq taava naalakkersuisut tutsuiginanngitsumik iliortut.
Nangillugu Natan Obed oqarpoq inatsiliornermi Inuktitut immikkut taaneqarsimanngitsut.
-Natan Obed, Inuit Tapiriit Kanadami præsidentiusoq oqarpoq, aammaarluni inatsisiliornermik pilersitsineq nunasiaateqarnermik aaqqissuinerup iluani matoqqasumi allataarpasissoq, inatsiliornerlu taanna Inunnut pinngitsaaliissutitut atortinniarneqartoq.
Canadami nunap inoqqaavisa oqaasiini Inuktitut atorneqarnerpaavoq, tassa Inuit 86 %-iisa Inuktitut oqaaserimmatigit.
Aamma Charlie Watt, Nunavimmi ingerlatsivimmi Makivimmi præsidentiusoq pakatsivoq oqaaseqarlunilu Makivik suliniuteqarniartoq inatsisiliornermik namminersortumik angusaqarniarnissani sulissutiginiarlugu, tassanilu oqaatsit Inuktitut illersorneqarnissaat pingaartinneqarnerussasoq.
-Tassami kissaatigaarput Inuktitut oqaatsivut ingerlalluassasut ineriartorlutillu, oqarpoq.
Natan Obed-ip aamma Charlie Watt-ip tamarmik erseqqissarpaat Inuktitut pillugit inatsisit pitsaanerusut pilersinniarlugit naalakkersuisunik suleqateqarumallutik.