INUIT: Nunatta isigineqarnera ajorseriartoq

- Kalaallit Nunaanniit ulluni makkunani nutaarsiassat takkuttartut assut aliasuutigaakka, saamerliunerpaani Enhedslistenimi Kalaallit Nunaannut tunngasunut oqaaseqartartoq Finn Sørensen oqarpoq.

- Uangami isumaga naapertorlugu Kalaallit Nunaanni maanna ataasimoorluni siunnerfeqarnissaq pingaaruteqaqaaq unammilligassarpassuaqarmat.

Pisoq uggornartoq

Danmarkimi partiit annersaanni Venstreni Socialdemokratenilu politikkimi nunap iluani pisunut toqqaannartumik akuleruterusunngillat. Socialdemokratilli Kalaallit Nunaannut oqaaseqartartuat Flemming Møller Mortensen oqarpoq:

- Isumaqarpunga kalaallinut inuiqatigiinnut tamanna assut uggornartuusoq. Danmarkimi politikeriusutut takusinnaavara Kalaallit Nunaanni inuiaqatigiit politikerillu akornanni tatiginninnerup tungaatigut avissaartuukkaluttuinnartut. Tamat oqartussaaqataanerannut tamanna paamitsannartuuvoq. Danmarkimissaaq tamanna aqqusaarsimavarput, isumaqarpunga politikerit tusaamaneqarnerminniit ajunnginnerusut.

Radikalit oqaaseqartartuat Helle Løvgreen Mølvig pisoq pillugu ugguarpoq. Tikkuartuerusunngillalli kukkunersiunermut ataatsimiisitaliap misissueqqissaarnera naammassitinnagu. Neriorsuivorli pisut partiip kalaallinut tunngasunut isiginninneranik allanngortitsinavianngimmata.

- Naamik, oqarsinnaavugut arlaat ajortuliorpat Kalaallit Nunaanut tamarmut ajortoq tutsittariaqanngimmat. Neriuutigaarali naalakkersuisut sinneri - ajortuliortoqarsimappat - pitsaasumik aqutsisussamik toqqaajumaartut, ajunngitsumik ingerlanissaq isumannaarneqarniassammat. Uagulli akuleruttussaanngilagut.

Dansk Folkepartiimili sakkortusaarnerupput. Søren Espersenip Aleqa Hammond qinersititseqqullugu sakkortuumik kajumissaarpaa.
- Isumaqarpunga tulluarnerusimassagaluartoq Aleqa Hammond qinersisoqarnissaanik suaaruteqartuuppat. Isumaqarluinnarpunga qinersisoqartariaqartoq taamaalilluni silaannaq salinneqarniassammat ingerlaqqittoqarlunilu.