Inuit nunamik piginnittussaanermik isumaqatigiissutaat qanorpiaq isumaqarpa???

Canadami inatsisartut nunamik piginnittussaaneq pillugu, Canadami Inuit nunap ilaanik pigisaqalerlutik Nunavumik 1999-imi pilersitsisoqarneranik kinguneqartumik akuersissuteqarnerannit juulip qulingiluaani ukiut 20-nngorput.
Allattoq Simon Uldum
juulip 10-at 2013 06:37

Nunamik piginnittussaatitaanermik isumaqatigiissut, pisortatigoortumik The Nunavut Land Claims Agreement Actimik taaguuteqartoq, nunamik piginnittussaatitaanermut tunngassuteqaannanngilaq. Indianerit qanga naalakkersuisunut isumaqatigiissutigisartagaannut assinguvoq nutaaliaallunili. Canadami Inuit isumaqatigiissutinik pisoqqanik taama ittunik isumaqatigiissuteqartarsimanngillat.

Nunamik piginnittussaanermik isumaqatigiissutit isumaqatigiissutillu nutaaliat atorlugit Inuit nunarujussuarnik pigisaqarnertik aningaasatigut iluaqutissarsiffigisarpaat, peqatigisaanillu aamma pisuussitinik piiasoqarneratigut royaltiesinik pissarsisinnaallutik, piniarsinnaatitaanerat aalisarsinnaatitanerallu qulakkeerneqarluni, piniarnermik nunamillu atuinermik aqutsinermut tamakkiisumik peqataatinneqarlutik kiisalu avatangiisit pillugit aalajangiinerni tamani tamakkiisumik peqataatinneqartarlutik. Aammattaaq aningaasatigut taarsiiffigineqarnissaannik qulakkeerisuuvoq.

Nunamik piginnittussaanermik isumaqatigiissut Nunavut pilersinniarneqarnerani alloriarnerit siullersaraat. Tamannarpiarlu pissutigalugu nalliuttorsiutigineqartarpoq.

Isumaqatigiissut sukumiisupilussuullunilu inatsisitigut periarfissarpassuarnik imaqarpoq, pingaartumik naalakkersuisut marluk akornanni isumaqatigiissutaammat, Canadami naalakkersuisut taamanilu Nordvest-territoriaasumi naalakkersuisuusut. Nordvest-territoria tassaavoq Nunavunngortinneqartoq.

Isumaqatigiissuteqarnermit ukiut 20-t qaangiutereeraluartut, isumaqatigiissutip imarisaata ilai suli tamakkiisumik atortuutilersinneqarsimanngillat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq