"Inuit Nunaat - Kalaallit Nunaat pillugu filmiliara" danskimit filmiliarineqartoq takuteqqaarneqarpoq
Danskit filmiliaat nutaaq piviusulersaarutaasoq ”Inuit Nunaat – Kalaallit Nunaat pillugu filmiliara” Danmarkimi ullumikkut takuteqqaarneqarpoq. Anne Regitze Wivel filmiliornermi ilitsersuisuuvoq.
Folketingimi ilaasortat Atlantikup avannaani suleqatigiinni namminersulivinnissaq oqallisigigaat filmimi malinnaaffigineqarsinnaavoq. Akunniliullugu inuit pissusiinik ilisimasallik danskeq nunatsinni inuit atugarisaanik naammattoorsimasaminik oqaluttuartinneqartassaaq.
- Filmi nipilersuutigineqartullu nuannersorujussuuupput nuanniitsorujussuullutillu. Ataqatigiinnissaannut tamanna pingaaruteqarpoq. Kalaallit erinagissorsuit sunniillaqqeqimmata neriuppunga isiginnaartut pissarsilluassasut. Navianartumilu najugaqarnermi pilliuteqartariaqarneq filmimi aamma takuneqarsinnaavoq, ilitsersuisoq Anne Wivel oqarpoq.
Danskip inuup pissusiinik ilisimasallip nunaqarfeeqqami innuttaasut nalaatarisimasai filmimi aqqisigut taasarlugit akunniliullugu oqaluttuarnerani pilliutaasarsimasut ersersinniarneqarput.
Tupaallattoqassappat ilitsersuisup paasisinnaalluarsinnaanerarpaa:
- Assut eqqarsaatigereerpara paasilluarsinnavaralu. Tamanna sillimaffigereerpara. Kalaallit Nunaat angisoorujussuuvoq assigiinngitsunik sammivilittut isikkulik paasisassarpassualillu. Killuussinianngilanga neriuppunga takutitassiara paatsoorneqassanngitsoq, Anne Wivel oqarpoq.
Atlantikup avannaani suleqatigiissitat isumasioqatigiinnerat filmimi malinnaaffigineqarpoq taamaalillunilu politikkikkut oqariartuuteqarluni. IA-meersup Kuupik Kleistip namminiilivinnissamik kissaateqarneq oqalugiutigaa. Taamatut kissaateqarneq Anne Wivelip nunatsinnut tikeqqaarami 70-kkut ingerlaneranni naammattooqqaarpaa:
- Taamani inuusuttuullunga sunut tamanut akerliuleruttorfimma nalaani IA aallartinneqarmat assut sunnertippunga. Sorpassuarnik takorluukkiortarpunga. Kalaallit ikinngutima namminersulivinnissamik kissaateqarnerat sakkortoorujussuusoq taamani malugisinnaavara. Nunasiaateqarnerup pilersissimasai nammakkunnaarlugit paasinnikkusussusera ilinniarsimasaralu aallaavigalugu iliuuseqartariaqarlunga tassanngannaq misigisimalerama una filmiliaraara.
Anne Regitze Wivel taama oqarpoq. Angu Motzfeldt tunuatungaani nipilersortuuvoq, taanna aamma filmimi takuneqarsinnaavoq. Filmi "Menneskenes Land - Mit film om Grønland" marsip 26-ani Katuami takutinneqalerpat ilitsersuisoq isiginnaaqataassaaq.
