Inuit najukkaminni oqaasissaqarnerat naggueqatigiit Inuit siuttuisa oqaluuseraat
Issittup immakkut angallavigineqarsinnaalernerata pisuussutinillu qalluisinnaanerup ajornanngissiartornerata kinguneranik, issittumi oqaasissaqarneq pillugu aalajangersaanissaq naalagaaffiit arfineq-pingasut pingaartikkiartuinnarmassuk, naggueqatigiit Inuit siuttui tamannarpiaq pillugu ataatsimiipput.
Inuit siuttuisa naalagaaffinnit sisamaneersut erseqqissarpaat, issittumi oqartussaaneq pineqartillugu naggueqatigiit Inuit oqallinnerni ataatsimiinnernilu allanut nallersuuttutut isigineqarlutik peqataasarnissaat pingaartillugu. Inuit issittumeersut, namminersulernikkut, isumaqatigiissutitigullu allatigut angusimasatik ataqqineqaqquaat. Inuit siuttui pisinnaatitaaffitik pillugit allakkiaqarusupput, Issittumi Siunnersuisoqatigiit apriilip qaammataani ataatsimiilerpata saqqummiutassaminnik. Pilersaarutigineqartut pillugit Kalaallit Nunaanni ICC-p siulittaasua, Aqqaluk Lynge oqarpoq, issittumi oqaasissaqarneq pillugu apeqqummi ataatsimut saqqummiinissaq alloriarnerussasoq pingaartoq.
Inuit siuttuisa Kuujjuarmi ataatsimiinnerminni aamma aalajangerpaat, naalakkersuisut nunanillu tamanit kattuffiit tusartinniarlugit ICC nunanit tamaneersut kattuffiattut periarfissatsialaasoq. Issittumi inoqarfiit namminersortut ataatsimik nipeqarnissaat tungavilerniarlugu ICC qaammatini tulliuttuni pingasuni allakkiamik aaqqissugaqarniarpoq.
Inuit siuttuisa ataatsimiinneranni Kalaallit Nunaanni naalakkersuisut aallartitaqarsinnaannginnerat ajuusaarutigigaluarpaat, naalakkersuinikulli pissutsit ilungersunarnerat paasilluarlugu, Kalaallit Nunaat taasisitsinissami tullinnguuttumi pilluaqquaat.
