Inuit naapinnertik nuannaarutigaat

Eva Aariak Nunavummi Naalakkersuisut siulittaasuata, ualimut atsioqatigiinnissamut isumalluarpoq, taamatullu aamma Floyd Roland Northwest Territoriaminngaaniit aallartitaq Aqqaluk Lyngetulli  isumalluarpoq.

- Isumaqarpunga ataatsimiinneq una, oqaluttuarisaanermi pingaaruteqartorujussuussoq, ullullu ingerlaanissaanut qilanaarpunga, ilimagalugulu ulloq ajunngilluinnartumik ingerlassasoq.

Eva Aariak tallimassaa nunatsinniippoq, Inuit assigiissuseqarnerat pillugu nunatsinniittarnini nuannarisaqaa.

-  Uummaa nuannertuaannarpoq Kalaallit Nunaanniilluni, Nunavummi Northwest Territoriesimilu inooriaaserput Kalaallit Nunaannut assingusorujussuuvoq, maanilu inuit takullugit assingunerpullu takusinnaallugu nuannersorujussuuvoq, Eva Aariak oqarpoq.

Floyd Roland Northwest Territoriesimiit naggueqaterput, Canadamiillu aallartitaq, ualimut atsioqatigiittoqarnissaanut Eva Aariatulli isumalluarpoq.

-  Nunat suleqatigiit atsioqatigiinnerat ataatsimiinnermi uani takusinnaavavut, siunissarlu eqqarsaatigalugu suleqatigiittuaannarnissap pingaaruteqassusaa qalleqqissarneqarluni, Floyd Roland oqarpoq.

Aqqaluk Lynge aperaarput, tulluusimaarutigineraa inunnik taamak amerlatigisunik naggueqatitsinniit tikeraartoqarnera.

- Tulluusimaarnaqaaq, naggueqatigut taamak amerlatigisut ataatsimooratta. Ukiorpassuarni sorsuutigisimasarput, tassa Inuit tusarnaarneqarsinnaannerat maanna anguarput. Isumaqarpunga, ullumikkut ulloq immikkut illuinnaqqissaartoq, Aqqaluk Lynge oqarpoq.