Inuit meerartaasa atugaat imaannaanngitsuupput

Mary Simon, Inuit Tapiriit Kanatami præsidentiat, Canadami “meeqqat peqqissuunissaannut aallartitatut” Ottawami persuarsiornertalimmik ippassaq toqqagaavoq.

Mary Simon Radioavisimut kinguninngua oqarpoq, politikkikkut maannamiit suliniarnermini meeqqat peroriartornerminni atugarisaat sammineruniarlugit, meeqqat isumannaatsumik toqqissisimasumillu avatangiiseqarlutik peroriartortariqarmata.

Apeqqutaangilaq inuiaqatigiit sunik ajornartorsiuteqarnersut qiviaraluarutsigilluunniit, imminut toqunnerit, pitsaanngitsumik ineqarnerit, pitsaanngitsumik ilinniartitaanerit imaluunniit ilaqutariinni angutaasernerit, Canadami meeqqanut allanut naleqqiullugit, inuit meerartaasa akornanni tamakku tamarmik ajornartorsiutit annersaraat.

Ajornartorsiut tamanna maanna qanoq iliuuseqarfigineqartariaqalerpoq, meeqqat peqqissuunisaannuut aallartitanngorlaaq isumaqarpoq, Mary Simonillu eqqaavaa, qimarnguinnik katsorsaavinnillu pisariaqartitsisoqarnera, peqqinnissaqarnikkullu pitsanngorsaasoqarnissaa.

Ineqartitaaneq, ilinniarfissanik periarfissat aningaasaqarnikkullu ineriartorneq meeqqat peqqinnissaqarnikkut iliuuseqarfigineqarnissaannut aamma attuumassuteqarluinnarpoq,

- Ajornartorsiutit tamakku immikkoortillugit suliarineqarsinnaanngillat, ataqatigiippummi, Mary Simon oqarpoq.