Inuit marluk israelimiut timmisartuisa qaartartumeerineranni toqutaasut
Israelimiut timmisartui Gazami Syriallu illoqarfiisa pingaarnersaata Damaskusip eqqaani sapaammi qaartartumeeripput.
Islamisiortut ingasaassiniat Islamisk Jihadimeersut eqqorneqartut, Israelip illersornissaqarfiata nalunaarutigaa. Nutaarsiassaqartitsivik Reuters taama allaaserisaqarpoq.
Nutaarsiassaqartitsivik AFP naapertorlugu Islamisk Jihadimeersut marluk saassussinerni toqutaasimasut, Islamisk Jihadip sapaammi nammineq nalunaarutigaa.
Damaskusimi unnuap qeqqata missaani qaartoortoqartoq nutaarsiassaqartitsiviup allaaseraa.
Saassussinerit aporaattoqarnerulerneranik kinguneqartoq
Damaskusip timmisartoqarfissuata eqqaani saassussisoqartoq, Inuttut pisinnaatitaaffiit pillugit Syriami alaatsinaattoqarfiup nalunaarutigaaa.
Syriamili naalagaaffiup nutaarsiassaqartitsiviata paasissutissat tamakku ilumuunnginnerarpai, qaartartummi igeriuttakkat nakkartinneqarsimasut oqaatigaat, mittarfillu eqqorneqanngitsoq oqaatigalugu.
Saassussinerit tamaani illuatungeriit akornanni aporaannerulernerannik kinguneqarpoq.
Palæstiinamiut qaartartunik igeriuttakkanik 20-nik Gazamit Israelip tungaanut sapaammi igeriussipput, qaartartulli ikinnerpaamik qulit Israelimit nakkartinneqarput, inunnillu ajoqusertoqarsimaneranik nalunaaruteqartoqanngilaq.