Inuit marluk Aasianni toqutsisimasutut pasineqarlutik tigummigallarneqarput
Politiit pisumut suli oqaaseqarumanngikkallarput, suli misissuisoqarmat.
Matoqqasumik killisiuinermut atatillugu tigummigallarneqartut arnaanersut angutaanersulluunniit, qassinik ukioqarnersut kikkuunersulluunniit oqaatigiumanngilaat.
Inuit marluk ippassaq ullaaralaakkut toqupput. Aasianni politiit imminut toqunniartoqarneranik siullermik kalerrinneqarput, nalunaaquttallu-akunnera ataaseq qaangiummat najugaqarfimmi allami kamaattoqarneranik nalunaarfigineqarlutik. Angut toqungasoq tassani siumorneqarpoq, nakorsarlu aggersarneqarmat paasineqarpoq angut toqoreersimasoq.
Politiit ilisimatitsissutigaat toqusut taakku marluk imminnut attuumassuteqarsinnaasut, toqutsinertullu isigineqartut. Politiilli aamma oqaatigiumanngilaat, sooq taama pisoqarsimanersoq. Tassa massakkorpiaq oqaaseqarusunngillat, annertuumilli maanna tassa misissuisoqarpoq.
