Inuit issittormiut uagullu qeqertarmiut assigiissuteqaqaagut, taama oqarpoq Tuvalumi avatangiisinut ministeri oqarpoq

Inuit issittormiut uagullu qeqertarmiut assigiinngikkaluaqaluta assigiissuseqartorujussuuvugut, taamaammallu ikioqatigiilluta nunanit annernit tusaaniarneqarnerulernissarput anguniartariaqarparput, Tuvalumi avatangiisinut ministeri oqarpoq.

Tuvalu manerassuarmi qeqertaararpassuupput katillugu 10.000-inik inuttussuseqartut, inuisa affaat illoqarfiit pingaarnersaanni najugaqarput, tassanilu mittarfeqarlunilu umiarsuavileqarpoq pilersuiffiusumik.

Kalaalllit Nunaat Tuvalulu assigiinngitsigalutik ikioqatigiiffissaqaramik?

Aap, ataatsimiinnerummi uuma tamanna siunertarigunarpaa, tassa nunat annerit siuarsimasut suliffissuaqarfiusullu paasisariaqarpaat silaannarmik mingutsitsisumik - co2-mik- aniatitsinerminnik annikillisaasariaqarlutik, avatangiisinut ministeri Samuelu Teo oqarpoq.

Silaannaap mingutsinneqarnera pissutaalluni Kalaallit Nunaata sermersua aakkaluarpat Tuvalumi ajutuussaagut:

Imarpissuaq 1 imaluunniit 2 meterimik qaffakkaluarpat Tuvalu suujunnaassaaq, imarmi 1 meterimik qaffappat Tuvalup 90 %-ta missaa immamik qallerneqassammat, Tuvalup avatangiisinut ministeria oqarpoq.

Isumaqarpunga Issittoq Tuvalulu, qeqertaaqqallumi allat, suli neriuutissaqartut nunarsuup aquttuisa akornganni ajornartorsiut eqqartorniarneqalermat.

Ajornartorsiutip silarsuup sinneranut siaruaatsinnissaa pingaarnerpaavoq, aqutsisut kisiisa pinnagit aammali nunarsuarmioqatigiit tamaasa pillugit. Inuiassuit ilisimannilerpata isumaqarpunga issittoq qeqertaaqqallu annaanneqarsinnaasut, Samuelu Teo oqarpoq.