Inuit Issittormiut Siunnersuisoqatigiiffiata ICC-p nunatsinni immikkoortortaa aningaasatigut ajornartorsiorpoq
Inatsisartut aningaasanut inatsisaat malillugu ICC-mut tapiissutit ukioq mannamit million koruuninik ikilineqareerput, ukiullu tamaasa pilersaarutigineqartutut 2018-ip tungaanut ilanngaavigineqartuassaguni nunatsinni immikkoortortap matunissaa aappaagumit piareersarneqartariaqassasoq ukiumoortumik ataatsimeersuarnermi nalunaarutigineqaqqammerpoq.
ICC-p siulittaasuata Aqqaluk Lyngep pissutsit ilungersunarsilluinnarmata Inatsisartut maannangaaq iliuuseqaqqullugit noqqaavigai.
-Suliffiugatta pingaaruteqartoq sulisullu sulisussarsiortariaqassammata matusinissamut aappaagumit piareersarnerit aallartissagivut ukiumoortumik ataatsimeersuarnermi allatut ajornartumik nalunaarutigaara, Aqqaluk Lynge nassuiaavoq.
Aqqaluk Lynge aamma oqarpoq, ukiut makku sumi tamani sipaarfiummat namminneq assigiinngitsutigut aamma sipaarniuteqareerlutik. Aningaasanut inatsit malillugu aningaasaateqarfinnut assigiinngitsunut qinnuteqarnissamut kaammattorneqarput, tamannali qangali ileqqorereernerarpaat periarfissallu tamakkereernerarlugit.
-Ingerlatsinissamik minnerpaamik tapiisoqarnissaa aningasaliisartut piumasarisarpaat, 2018-imillu taperneqanngikkutta qanoq iliussagatta? Aqqaluk Lynge aperaaq.
ICC nunatsinnut pingaaruteqarsimaqippat Naalakkersuisut sooq tusaaniarnerunnginnersut apeqqutigatsinni akisinnaannginnerarpaa, erseqqissaatigaali Naalakkersuisut siulittaasuata Aleqa Hammondip ICC-p aallartitaanut 2012 tikillugu ilaagami oqartussaaffiit tamakku qanoq kinguneqarsinnaaneri nalunngereerai.
Aamma isumaqarpoq, ICC-p nunatsinni immikkoortortaa matussappat nunatta avataanit kusanartumik isigineqarneranut innarliissasoq.