Inuit Issittormiut Kattuffiat nutaamik taaguuteqalissaaq
Nunatsinni kattuffiit peqatigiiffiillu 18-it, ICC-mit taasisinnaatitaallutik aallartitat, ukiumoortumik ataatsimiittarnerat Nuummi ullumi ingerlanneqarpoq. Pilersaarutaavoq Alaskami Barrowimi aasaru ataatsimiittoqassasoq.
Nunarput sinnerlugu ICC-mi præsidenti Aqqaluk Lynge Barrowimi ataatsimiinnissami pilersaarutit pillugit oqarpoq:
- Pingaarnertut oqaasinnaarisussaavarput assigiinngissitaarnermi ataatsimoorneq. Una pingaartillugu, naalagaaffinni assigiinngitsuni naggueqatigiit inuit najugaqarpugut, silaannaap ukiuni makkunani allanngorujussuarneratigut imaanaanngitsumik atugaqarpugut, aamma uumassusilinnik inuussutissarsiuteqarnitsinni avataaniit malersorneqartorujussuulluta.
Ataatsimiinnermi eqqartorneqartut ilagaat ICC-p nutaamik aaqqissuunneqarnissa kalaallisullu taaguserneqarnissaa. Aqqaluk Lynge ilaatigut oqarpoq, aasamut ataatsimeersuarunik aalajangersagassamik minnerunngitsumik ilagisussaassagaat ICC-p nutaamik aaqqissuunneqarnissaa, aamma ilisarnaat nutaaq, aterlu nutaaq, saqqummiunneqassasut.
ICC nutaamik qanoq taaguuteqalissanersoq Aqqaluk Lynge-p suli oqaatigisinnaanngikkallarnerarpaa, kattuffianili ateq toqqammavik ”Inuit” suli atuutiinnassanerarpaa, siunnersuutinulli ilaasimanerarpaa ”Inuit Siunnersuisooqatigiiffiannik” taaguuteqalissasoq.
