Inuit inuusuttaasa ilinniariaasiat qulaajaqammerpaat

Inuit Tapiriit Kanatami Canadap ilinniartitaaneq pillugu siunnersuisoqatigiivi suleqatigalugit Inuit ilinniarsimassusiat ilisimassusiallu pillugit nalunaarusioqqammerput. Inuit inuusuttaat amerlavallaat ilinniakkaminnik suli naammassinnigatik ilinniarfinniit anisarput. Tamannalu pissutigalugu ammut isigineqartarput.

Kisiannili nalunaarusiortut oqarput, apeqqutaasoq, iluatsitsineq qanoq uuttorneqassanersoq. Nunani killerni iluatsitsinermut uuttuutit ilinniartitaanerup iluani maannamut atorneqartarsimapput. Tassa inuusutut atuakkaminnik qanoq pissarsitigisimanersut apeqqutaatinneqartarluni.

Kisianni nalunaarsiortut oqarput, ilinniarneq tassaaginnangilaq atuarneq. Aamma kulturimikkut ilisimassusermik angusaqartarput, oqaatsiminnik ileqquminnillu ilinniarlutik, aammalu angajoqqaatik, utoqqartatik inuiaqatitillu ilaginerisigut. Aamma ilisimassuseq avatangiisinit nunamillu avatangiisiminnit angusassaavoq. Atuakkatigut ilisimasaqalerneq kisimi pinnani, tamakkua tamarmik inuit ilinniarnerannut ilaasut, nalunaarusiortut oqarput.

Canadap ilinniartitaaneq pillugu siunnersuisoqatigiivini pisortap Paul Capponip nalunaarusiaq decembarimi saqqummiukkamiuk oqarpoq, Inuit inuusuttaat pikkorlunnerarlugit ilinniagakinnerarlugillu oqartarneq naammalertoq. Inuit ilinniarsimannginnerarlugit nikassaalluni oqalunneq ingasappallaaaqaaq. Tassami Inuit akornanni ilinniarneq inuuneq tamaat pisarpoq, tassanilu nunani killerni ilisimasat qangarniillu ilisimasat ilaasarput, aammalu atuarfinni atuarfiillu avataanni ilinniarnerusarluni.

- Taamaammat iluatsitsineq allarluinnaat tunngavigalugit uttorneqassaaq, Paul Cappon oqarpoq.

- Naak suli naammassiniagassaqaraluaqisoq, Inuit inuusutaasa ilinniartarnerannik nutaamik paasinninnissamut nalunaarusiaq pingaaruteqarpoq, Inuit Tapiriit Kanatami præsidentiat, Mary Simon, oqarpoq.