Inuit Indianerillu isumalluarput

Canadap ministeriunerata Stephen Harperip nunap inoqqaavinut utoqqatsernera piffimmut nutaamut ikaarsaariarnertut isigineqarsinnaavoq.
juunip 15-at 2008 14:15

Taama oqarpoq Canadami nunap inoqqaavisa katersuutinneqarnerannut siuttuusoq Phil Fontain, taannami isumaqarpoq ministeriunerup utoqqatsernera nunap inoqqaavisa tamakkiisumik isigineqarnerannut allannguutaasinnaasoq, taamaalilluni indianernut inuiaqatigiinnullu inunnut isummanik pigiliutiinnakkatut ittunik isiginneriaatsit allanngoriartulersinnaasorigamigit.

Taassuma aamma neriuutigaa utoqqatserneq tamanna nunap inoqqaavisa atugaannut ukkussinerusoqalernissaa taamaalilluni nunap inoqqaavisa atugaat pitsaanerulersinneqarniassammata.

- Ilissi kissaateqartarnissituulli uaguttaaq inuunitsinni kissaateqarpugut, Phil Fontaine sisamanngormat nunap inoqqaavisa katersuunneranni ilaatigut taama oqarpoq. Taassuma aamma neriuutigaa piitsuussutsip illuatungaanut saatsikkiartuaartinneqarnissaa kiisalu atuarfiit illullu pitsaanerulersinneqarnissaat taamatuttaaq imeqarnikkut eqquluinnerusumik atugaqalernissaq taamatuttaarlu meeqqat inissiisarfinnut inissinneqartartut ikinnerulersinneqarnissaat kiisalu parnaarunneqartartut ikinnerulersinneqarnissaat.

- Siunissarput unammillernarsivoq utoqqatsernerullu tamassuma suut tamaasa ajornanngissisipaalusooq, Phil Fontaine taama oqarpoq.