Inuit Games-imi pissartanngorniunnerit ullumi aallartissapput
Nunatsinni pisortatiguunngitsumik ingerlanneqartumik ullumi aqagulu Ilulissani ingerlanneqartussami nuna tamakkerlugu Ilulissat timersortarfianni unammersuartoqassaaq.
Inuit Pinnguaataasa nunatsinni issittumilu siammarternissaat siunertarineqartoq, Nuka Kleemann, aaqqissuisoq sungiusaasuunerlu Inuit Games Greenland-imit nalunaarpoq.
Aamma siunertaavoq Inuit Pinnguaataasa peqatigiiffiisa kattuffiliorneqarnissaat.
Inuit Pinnguaataannik klubbit peqataatitaqartussat illoqarfinnit nunaqarfinnillu ukunaneersuupput:
Qaqortoq, Sisimiut, Maniitsoq, Ilulissat, Qeqertaq, Uummaannaq aamma Upernavik.
Unammisussat 35 missaannik amerlassuseqassapput, pitsaanersaallu Arctic Winter Games-imut Canadami aappaagu marsimi ingerlanneqartussamut peqataatinniarlugit sungiusalernissaat pilersaarusiorneqalissasoq, Nuka Kleemann oqarpoq.