Canada: Inuit eqqumiitsuliaat 150.000-init sinneqartut digitalinngortinniaraat
Nunaqarfimmi Cape Dorsetimi eqqumiitsuliortut sulliviannik ammaasoqarmat naggueqatigiit Inuit nutaalianik eqqumiitsuliaat 1950-ikkut naalernerini takussaallualerput. Nunaqarfik Cape Dorsetimik suli taagorneqarpoq, naak inuktitut Kinngait taaguutigilersimagaluarlugu Canadamilu eqqumiitsuliortunit amerlanerpaanit najugaqarfigineqaraluartoq.
Nunaqarfimmiut eqqumiitsuliortui ukkusissamik qiperukkanik, ujaqqamik kigartukkamik naqitikkanik titartakkanillu suliaqartarput, taakkulu nunarsuaq tamakkerlugu ilisimaneqarput pisiarineqartarlutillu. Cape Dorsetimi eqqumiitsuliat ilaat Nuummi saqqummersinneqaqqammerput kingusinnerusukkullu aamma Ilulissani saqqummersinneqartussaallutik.
AAMMA ATUARUK Nunavummiut eqqumiitsuliaat Nuummi saqqummersinneqartut
CBC News naapertorlugu, eqqumiitsuliortut kattuffii marluk Cape Dorsetimi eqqumiitsulianik nittarsaassinermik suliaqartut Cape Dorsetimi eqqumiitsuliat piffissaagallartillugu digitalinngortinnissaannut Canadami kultureqarnermut ministereqarfimmit aningaasaliiffigineqarsimapput.
Eqqumiitsuliat katillugit 155.500-t digitalinngortinneqassapput, tassaallutik qiperukkat, ujaqqamik kigartukkamik naqitikkat titartakkallu. Taakku Cape Dorsetimi toqqorsivinnit aammalu inuit marluk namminneq katersaannit amerlasuupilussuarnit ktersorneqassapput.
Digitalinngorlugit assilisat kingorna aaqqissorneqassapput kingusinnerusukkullu saqqummersinneqassallutik, Canadami naggueqatigiit Inuit eqqumiitsuliaasa qanoq allanngoriariartorsimaneri tamanit takuneqarsinnaasunngorlugu.
Digitalinngortitsinermik suliap ukiut pingasut qaangiuppata naammassisimanissaa naatsorsuutigineqarpoq.
