Inuit coronavirusimik tunillanneqarsimasut marlunnik amerlipput

Coronavirusimik tunillanneqarsimasut Nuummi amerlipput. Aappaa Namminersorlutik Oqartussani sulisunut qanittumik inissisimavoq, nunattalu nakorsaanera tunillatsissimasinnaalluni.
Naalakkersuisut siulittaasuat coronavirusip tuniluunneranut atatillugu sapaammi saqqummiussimmat tusagassiortut inimi saqqumiisarfimmi najuutinngillat. Asseq: Toqqorsivimmit Assi © : KNR
Allattoq Mads Lynge
marsip 22-at 2020 14:38

Inuit coronavirusimik tunillanneqarsimasut marluk tunillanneqarsimanertik ullumi sapaammi paasivaat.

Naalakkersuisut siulittaasuat Kim Kielsen tusagassiortunik katersuutsitsinermi ullumi sapaammi tamanna ilisimatitsissutigaa.

Inuit 77-it misissorneqarnerminnut atatillugu akissutissarsipput, taakkunanngalu marluk coronavirusimik tunillanneqarsimasut paasinarsivoq.

Naalakkersuisut siulittaasuat taama ilisimatitsivoq.

- Ajuusaarutigalugu nalunaarutigssavara inuit allat marluk coronavorusimik tunillanneqarsimasut paasineqarmat. Tunillanneqarsimasut Nuummeersuupput, naalakkersuisut siulittaasuat taama nalunaaruteqarpoq.

Tunillanneqartoq nunatta avataani tunillanneqarsimavoq.

Tunillanneqarsimasuni ataaseq Namminersorlutik Oqartussani atorfilimmut qanittumik inissisimasoq, Kim Kielsenip oqaatigaa.

Nualluutip tuniluutilertunnginnnissaa pillugu Namminersorlutik Oqartussani sulisut peqquneqarput imminnut qanillattornaveersaassasut, naalakkersuisut siulittaasuat oqarpoq.


Naalakkersuisut siulittaasuat tamanna pillugu tusagassiortunik katersuutsitsinermut atatillugu immikkut ittumik aamma iliuuseqalerpoq. Tusagassiortut tamanna pillugu inimi saqqummiussisarfimmi ataatsikkut isersimaqqusaajunnaarput, inuit qanillinaveersaarnissaannut malittarisassat malinneqarsinnaanngimmata.
 
Coronavirus inuiaqatigiinni kigaatsumik suli tuniluuttoq, Kim Kielsenip ilanngullugu oqaatigaa:
 
- Aamma oqaatigerusupppara nualluutip massakkumut siammariartornera sukkaatsunnguamik ingerlaarujoortoq takusinnaagatsigu. Taamaattoq innuttaasut pisortat innersuussutaat malissagaat kaammattuutigissavara, naalakkersuisut siulittaasuat oqarpoq.
 
Nunatta nakorsaanera: Tunillanneqarsimasinnaavunga
Tusagassiortunik ullumi katersuutsitsineq marlunnut avinneqarsimavoq. Nunattalu nakorsaanera Henrik L. Hansen Kim Kielsenip saqqummiussaanut ilanngussaqarpoq:
 
- Tunillanneqarsimasup aappaa Namminersorlutik Oqartussanut qanittuaqqamik ataveqarpoq. Attavigisartakkani ima qanitsigai, Nunatta Nakorsaaneqarfiani sulisuusuusugut qularutissaanngitsumik tunillatsinneqarsimasinnaalluta, nunatta nakorsaanera oqarpoq.
 
Tamanna pillugu isumannaallisaanerit immikkut ittumik sukateriffigineqarput:
 
- Kim Kielsenip tunillanneqaratarsinnaanera, naalakkersuisullu allat tunillanneqaratarsinnaanerat pillugu immikkut ittumik iliuuseqarpugut. Taamaammat kisimiillunga maani inimiippunga, Henrik L. Hansen oqarpoq.
 
Tunillanneqartup aappaa Ilisimatusarfimmeersuuvoq. Tunillinneqarsimasut pillugit sapaatip-akunnerata siuliani saqqummiisoqarmat inuk ataaseq tunillanneqarsimasoq oqaatigineqarpoq.
 
Inuit tunillatsissimasumut qanissimasinnaasut ilisimatinneqareersut nalunaarutigineqarpoq.
 
Sinerissaminngaanneersunik aamma misissuisoqarpoq, arlaannaalluunniillu tunillatsissimanngitsoq nalunaarutigineqarluni. Nuup avataani tunillatsittoqarsimaneranik takussutissaqanngitsoq maannangaaq ilimagineqarpoq.
 

Nunatsinni coronavirusimik tunillanneqarsimasut taamaasillutik sisamanngorput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq