Inuit CITES-imi ajugaapput

Ataatsimeersuarnissaq sioqqullugu Canadami naalakkersuisunit oqaatigineqartarpoq, nannut nungutaanissaat aarlerinartoqanngitsoq aamma nungusaataanngitsumik nannunniartoqartartoq oqaatigalugu.

Bangkok-imili ataatsimeersuarnermi Amerikamiut uumasunik illersuiniaqatigiivinit aamma allanit uumasunik illersuiniaqatigiinnit oqaatigineqarpoq, Canadami nannut nungutaanissaat aarlerinartoqartoq, taakkuli taama oqalunnerat CITES-imi ataatsimeersuaqataasunit amerlasuunit isumaqatigineqaraluarpat, Canadap issittortaani nannunniartartut inuuniutaat ulorianartorsiortinneqalersinnaagaluarpoq.

Ataatsimeersuarnermi peqataasut ilaannit, Inuit Tapiriit Kanadami siulittaasup, Terry Aalla-p Amerikamiunut akerliulluni oqalugiarnerata kingorna naggueqatigiit Inuit tapersersorneqarnerat iluatsippoq, ataatsimeeqataasunimmi amerlanerussuteqarluartunit naggueqatigiit Inuit isumaqatigineqalermata, taamaalilluni Canadami nannut nungutaanissamut aarlerinartorsiunngitsut taasinermi amerlanerussuteqartut isumaqatigaat. 

- Taasinermi inernerusoq Canadap inoqqaavinut ajugaaneruvoq pingaaruteqarluartoq, Nunavummi naalakkersuisuni ilaasortaq, Tagak Curley oqarpoq, taassuma ilanngullugu oqaatigaa, Canadami nannut aatsaat taama amerlatigilersut, allaat utoqqarnit tamanna oqaatigineqartartoq oqaatigalugu.

Nannut ulorianartorsiortitaannginnerat pillugu taasisoqarmat, isumaqataasut 42-uupput isumaqataanngitsut 38-ullutik.

Bangkok-imi ataatsimeersuartoqarnerani naggueqatigiit Inuit sukataarnerat ICC-ip præsidentiata, Aqqaluk Lyngep nuannaarutigaa oqarluni, suliami taama imaannaanngitsigisumi naggueqatigiit Inuit nannunniarsinnaatitaanerat qulakkeerneqarmat, ICC-mit nuannaarutigineqartoq.