Inuit Canadamiut nunatsinnut timmisartukkut aqquteqalerusupput
Nunavummi nalakkersuisut siulittaasuata Eva Aariap kiisalu Nunavummi aningaasaqarnermut angallannermullu naalakkersuisup Peter Taptunap, Naalakkersuisut siulittaasuat Kuupik tallimangormat Iqalunni ataatsimeeqatigivaat taamatullu timmisartortitseqatigiiffiup Air Greenland-ip aallartitai.
Canada-mi nutaarsiassaqartitsivikk CBC News taamatut allaaserisaqarpoq.
Canada-p nunattalu akornanni timmisartukkut attaveqalernissamut periarfissat timmisartortitseqatigiiffiup Air Greenland-ip mississorniarlugit nalunaarutiginikuuvaa.
Canadap nunattalu akornanni timmisartukkut angallasisarneq 2001-imi unitsinneqarpoq.
Air Greenland-ip Canada-mi timmisartukkut tikinneqarsinnaasut arlaqartut mississuiffigaat.
Ilaatigut uuliasiortut arlaqartut uuliasiorsinnaanerminnik Kalaallit Nunaanni mississuisut, Canadap kangimut sineriaani illoqarfinni arlaqartuni allaffeqarput taakkua Nunavut kujataani inississimallutik.
Iqaluit timmisartunut attaveqaatitut kisiat eqqarsaatigineqannginnissaa, Eva Aariap naalakkersuisuisalu pingaaruteqartutut isigaat.
Oqaatsivut kulturerput oqaluttuarisaanerpullu assigiipput, taamaattumik kulturikkut attaveqaaterput nukittorsarneqarnissaaq, timmisartukkut attaveqalerpat Nunavummi naalakkersuisut siulittasuat Eva Aariak oqarpoq.
Aningaasaqarnermut naalakkersuisup Peter Taptunap aningaasaqarnikkut iluaqutissartai soqutigineruai.
Ukiuni makkunani issittumi nunat soqutigineqartorujussupput, nunarsuarmilu inuppassuit niuernikkut attaveqalernissaminnut kissaateqarlutik saaffiginnittut amerlapput, Peter Taptuna oqarpoq.
