Siumut Inuit Ataqatigiinnut naalakkersuisooqatiginninniarnissaminnik anguniagaqarsinnaanertik mattuterusunngilaa.Assi: KNR / Malik Brøns

Inuit Ataqatigiit ullumimit isumaqatigiinnialereertut

Inuit Ataqatigiit siulittaasuat, Múte B. Egede, naalakkersuisunngortitsinissamut ullumimit isumaqatiginninniarusuppoq.

Inuit Ataqatigiit Inatsisartunut qinersinermi ajugaapput.

9.912-nik taaguunneqarluni. Partii taaguunneqarnermigut 2.400-nik siuariarpoq, taamaalillunilu inatsisartunut aqqaneq marlunnik issiatitaqalerput.

Inuit Ataqatigiit Siumut ajugaaffigaat, Siumut 7.971-init taaguunneqarpoq. Taakku Inatsisartunut ilaasortaatitatik qulit aamma paariinnarpaat.

Maanna Inuit Ataqatigiit isumaqatiginninniarnissaat apeqqutaaginnalerpoq. Ilaatigullu Naleqqakkut isumaqatiginninniarfigineqarnissaat ilimanaateqarluinnarpoq, taakkummi inatsisartuni issiasuutitaminni ataatsimik ilapput.

AAMMA ATUARUK IA-p siulittaasua: Tamassinnut qujanaq!

Siumut siulittaasuata, Erik Jensenip Inuit Ataqatigiinnut naalakkersuisooqatiginninniarnissaminnik anguniagaqarsinnaanertik mattuterusunngilaa.

- Tasssa ullut tullii oqaloqatigiinnerit assigiinngitsut ingerlasussaassapput, taakkulu aamma qilanaarluta peqataaffigissavagut. Inatsisartunut qinigaasut kommunimullu qinigaasut assigiinngitsunik oqaloqateqallattaanerit ingerlatissagaat qularutiginngilara.

Partiit siuttui unnukkut oqallinneranni Siumut siulittaasuat, Erik Jensen, taama oqarpoq. Qinersinermi Siumukkut taarserneqarlutik IA-kkut nunatsinni aqutsisunngortinneqarmata.

Siumut katillutik 7971-nik qinerneqartoq, 2018-mi qinersinermiit sanilliullugu 14-nik qinerneqarnerunertik siulittaasup ersersarpaa, taamaattorli IA amerlanerussuteqartunit qinerneqarpoq, taamaasillunilu kikkut Naalakkersuisunngornissaanut oqartussaanerpaalerluni.

AAMMA ATUARUK Ilisimatooq: Aatsitassarsiulersaarneq siulittaasunngorniuunnerlu qinersinerup inerneranik aalajangiisuupput

Siumut peqatigalugu naalakkersuisuutitaqalerumaarnersoq piffissap takutikkumaaraa, Erik Jensen, oqarpoq.

- Tassa soorunami qineqqusaarutigisasut, partiitta anguniagai, taakku sallerpaajutillugit oqaloqatigiinnerit ingerlatissavagut, taanna oqarpoq.

Siumut isumaqatiserineqassaguni una ilimagineqarsinnaavoq:

- Neriorsuutigisinnaanngilarput qanoq inerneqarumaarnissaa. Oqaloqatigiinnerit ingerlateqqaartariaqarpagut, aamma suut pillugit oqaloqatigiittoqassanersoq inerneqariartuaartoqassasoq qularutiginngilarput. Kisianni mattussereernianngilagut, oqaloqatigiinnerit torersumik pitsaasumik qineqqusaarutigisimasagut aallaavigalugit oqaloqatigiinnerit ingerlatissavagut.

Naak Kim Kielsen taaguunneqarnerugaluartoq, taassumap, partiip ataatsimeersuaqqinnissaata tungaanut, siulittaasuuginnarnissani erseqqissaatigaa.

Isummersuutit

Nannumik assiliisoq © Vilhelm Lynge Hard

TV, radio: Qinersisartunik ataatsimiititsinerit

INATSISARTUNUT QINERSINEQ #IQ2021

Illoqarfinni assigiinngitsuni qinersisartunik ataatsimiititsinerit tv-kkut radiukkullu aallakaatilerpagut.

Sumiiffiit ornillugit imaluunniit Facebookimi quppernitsinni KNR-imi Qinersinermi apeqquteqarnissamut periarfissaqarputit:

facebook.com/qinersineq

Pilersaarutit uani takukkit