Inuit Ataqatigiit tamanut suleqatiginnikkumapput
Inuit Ataqatigiit ippassaq unnukkut apeqqarissaarfigineqarnerisa kingornagut, siulittaasup Kuupik Kleistip oqaatigaa, naalakkersuisunngortussat inatsisartuni amerlanerussuteqarluartut tunuliaqutaralugit ukiuni tulliuttuni sisamani suliassat pillugit oqaloqatigiilluarnissaat pingaaruteqartoq.
Allattoq Elisa Isaksen
maajip 27-at 2009 07:38
- Naalakkersuisunngortitsiniarnermi siuttunngussagutta imaluunniit kikkulluunniit siuttunngussagaluarpata, taava pisussaaffittut isigaara qinigaasut partiit tamarmik oqaloqatigineqarnissaat. Uani pingaartorujussuuvoq Inatsisartut Naalakkersuisullu sapinngisamik amerlanerussuteqarluartut ukiuni tullerni sisamani suliassat pillugit oqaloqatigiilluarsinnaanissaat, taamaalillunilu aamma amerlanerussuteqarluarluni ingerlatsisinnaaneq anguneqarsinnaalluni. Uani pineqanngilaq partii Siumuunersoq imaluunniit Kattusseqatigiit partiiat pineqarnersoq, kisianni isumaqatigiinniarnerni ingerlatsisussat pisussaaffigivaat qinigaasut tamaasa oqaloqatigissallugit, Inuit Ataqatigiit siulittaasuat Kuupik Kleist ippassaq unnukkut taama oqarpoq.
